Temirtaýda ónerkásiptik gazdardyń óndirisi keńeıtiletin bolady

Onda aldaǵy eki jylda júzege asyrylady dep josparlanǵan jobalar usynyldy, dep habarlaıdy óńir ákimdiginiń resmı saıty. 

- Bul Keńestiń tórtinshi otyrysy. Atalmysh organ ınvestorlardy qoldaý, jobalardy júzege asyrýda kezdesetin problemalyq máselelerdi sheshý úshin qurylǵan, - dep atap ótti oblys ákiminiń orynbasary Almas Aıdarov. 

Keńestiń úshinshi otyrysynda berilgen tapsyrmalardyń oryndalýy týraly Ónerkásip jáne ındýstrıaldy-ınnovatsııalyq damý basqarmasynyń basshysy Ǵalymjan Jumasultanov málimdedi. Sonan soń ınvestıtsııalyq jobalar tanystyryldy. 

Temirtaýda «LindeGasKazakhstan» JShS aýany bólgish qurylǵynyń ekinshi kezegin salý» jobasy júzege asyrylady. 

- Bizdiń óndiris is júzinde jumys istep tur. Birinshi blok 2013-shi jyly qoldanysqa engizilgen bolatyn. Biz  ottek, azot jáne argon óndiremiz. Negizgi klıentimiz "ArselorMıttal Temirtaý" AQ. Ónim negizinen ishki naryqqa barady jáne de jaqyn shet elderge eksporttalady. Reseı, Qyrǵyzstan, Ózbekstan, Ázerbaıjan elderine, - dedi jobanyń jetekshisi Rýslan Fılıppov. - Qazirgi tańda óndiristi keńeıtý boıynsha jańa jobany júzege asyryp jatyrmyz. Ekinshi blokty iske qosý 2019-shy jyldyń sońyna josparlanyp otyr». 

 Onyń aıtýynsha, ınvestıtsııalar shamamen 70 mln eýrony quraıdy. Qazirgi kúni jobalyq-smetalyq qujatty jasaý jumystary aıaqtalýǵa jaqyn, ol sońyra memlkettik saraptamaǵa jiberiletin bolady. 

 Oblys ákiminiń orynbasary ınvestor bılik tarapynan qajetti kómek alatynyn aıtty. 
- Bul biz úshin óte mańyzdy joba, - dedi Almas Aıdarov. - Linde toby álemdegi eń iri tehnıkalyq gaz tasymaldaýshylardyń biri bolyp tabylady. Kompanııanyń keńeıýge jáne ınvestıtsııa quıýǵa degen nıetteri  óte mańyzdy qadam. Jer telimderin bólýge qatysty suraqtar týyndaǵan bolatyn. Qazir olar sheshimin tapty. Qazir eń bastysy - ruqsat rásimderinen barynsha jyldam ótý. 

 Sondaı-aq otyrys barysynda jalpy quny 7 mlrd teńgeni quraıtyn «ForeverFourshingCo. Ltd.» JShS metall eritý zaýytynyń qurylysy" jobasy usynyldy. Jańa zaýyt Qaraǵandyda qytaılyq seriktesterdiń kómegimen salynyp jatyr. Jańa óndiris orny 200 jumys ornyn usynady. 

 Oblys ortalyǵynda júzege asyrylatyn taǵy bir joba avtokólikterdi satý jáne servıstik qyzmetke qatysty. Іri zamanaýı avtoortalyq salynady dep josparlanýda, onda «BMW» «Subaru» «Hyundai» markaly avtokólikter satylyp, olarǵa qyzmet kórsetiletin bolady. Quny 1,2 mlrd teńgeni quraıtyn jobanyń bastamashysy «EurasiamotorsKaraganda» JShS. Avtoortalyqtyń birinshi korpýsynyń qurylysy 2019-shy jyldyń kúzinde aıaqtalady.