Temirtaýda memlekettik qyzmet sapasyn arttyrý úshin eki shtaty bar jańa bólim ashyldy
QARAǴANDY. QazAqparat - Temirtaýda «Memlekettik qyzmet kórsetý sapasyn baqylaý bólimi» atty jańa bólim ashyldy, dep habarlaıdy QazAqparat.
Temirtaý qalasynyń ákimi Ǵalym Áshimovtyń habarlaýynsha, bólim Memlekettik qyzmeti isteri jáne sybaılas jemqorlyqqa qarsy kúres agenttigi departamentiniń usynysymen ashylǵan. Ondaǵy maqsat - qalada memlekettik qyzmettiń kórsetilýin barynsha jetildirý. Atalmysh bólimniń mamandary kórsetiletin memlekettik qyzmetterdiń sapasyna kún saıyn monıtorıng júrgizip otyrady. Arnaıy konkýrstyń nátıjesinde bólim basshysyna laıyqty degen kandıdatýra tańdap alyndy. Ol Samat Zııashevtyń kandıdatýrasy. Ol turǵyn úı, kommýnaldyq sharýashylyq bóliminiń jetekshisi qyzmetin atqaryp kelgen bolatyn. Turǵyn úı, kommýnaldyq sharýashylyq bólimin ýaqytsha Nızamı Gadjıev basqarýda.
Ákimdiktiń baspasóz qyzmetiniń habarlaýynsha, osy kezde Samat Zııashev biliktiligin arttyrý úshin bilimin jetildirýde. Osyǵan qaraı bólim basshysynyń mindetin atqarý Sholpan Temirbekovaǵa júktelgen.
«Jańa bólimniń maqsaty qaladaǵy jergilikti bıýdjetten qarjylandyrylatyn atqarýshy organdardyń memlekettik qyzmet kórsetý sapasy boıynsha aqparattardy jınap, óńdeý jáne taldaý bolyp tabylady. Jańa bólim mamandary jergilikti atqarýshy organdar tarapynan atqarylatyn jumystar boıynsha aı saıyn materıaldar jınap, olardy saraptap, baqylaý júrgizip otyrady»,-dedi Temirtaý qalasy ákimdiginiń baspasóz hatshysy Olga Gorıacheva.
Bólim shtatynyń sany nebári 2 mamannan turady.
