Temirtaýda memlekettik kásiporyn basshysy bıýdjetten tys qarajatty jymqyrǵan
QARAǴANDY. QazAqparat - «Oqjetpes-T» kommýnaldyq memlekettik kásipornynyń dırektory Erlan Óteshevke bıýdjetten tys qarajatty jymqyrdy degen aıyp taǵyldy, dep habarlady «QazAqparat» HAA tilshisi.
Temirtaý ákimdiginiń baspasóz hatshysy Olga Gorıacheva habarlaǵandaı, qala bıýdjeti «Oqjetpes-T» kommýnaldyq memlekettik kásipornyna jarty mıllıon teńge aýdarǵanyn, alaıda bul aqsha keri qaıtarylǵanyn habarlady.
«Baqylaýshy organdar magıstraldy kúrdeli jóndeýge arnalǵan qubyrlardy satyp alýǵa bólingen aqsha tender arqyly júzege asyrylýy tıis ekenin tanydy. Ákimdik qyzmetkerleri sol jerde qateni túzetip, bıýdjetke qarajatty qaıtardy. Bul bıýdjettik qarajatty jumsaý túrinde teris saldarǵa soqtyrǵan joq», - dep habarlady Olga Gorıacheva.
Kásiporyn basshysy Erlan Óteshov tutynýshylar kommýnaldyq qyzmetti tólegen kezde jınalǵan qarajatqa qubyr satyp aldy. Jaramsyz qubyrlardy aýystyrý úshin kásiporyn osy aqshany paıdalandy.
«Bıýdjetten bir teńge jumsalǵan joq. «Oqjetpes-T» memlekettik mekeme bolyp tabylatynyna qaramastan, bıýdjettik qarajat emes, halyqtan kommýnaldyq qyzmetke jınalǵan qarajatty urlaǵan», - dep habarlady Olga Gorıacheva.
Sybaılas jemqorlyqqa qarsy is-qımyl ulttyq bıýrosynyń Qaraǵandy oblysy boıynsha departamentiniń tergeýshisi Erlan Óteshov pen «Kaz Temir stell» kompanııasynyń menedjeri eski jaramsyz qubyr satyp alyp, ony jańanyń ornyna usynǵany anyqtaldy.
Ulttyq bıýro qyzmetkerleri qubyrlardy Ulttyq saraptaý jáne sertıfıkattaý ortalyǵyna saraptamaǵa jiberdi. Qorytyndyda qubyr qabyrǵasy eskirgeni, sapa talabyna sáıkes kelmeıtini, jemirilgen jerleri bar ekeni anyqtaldy.
Sot býhgalterlik saraptama kórsetkendeı, «Oqjetpes-T» kompanııasyna 27 mıllıon 500 myń 829 teńge shyǵyn keltirildi. Sot tyńdaýy jalǵasýda.
