Temirtaýda Máńgilik alaýdyń qola juldyzyn urlaǵan er adam ustaldy
QARAǴANDY. QazAqparat - Temirtaýda quqyq qorǵaý organdary Ekinshi dúnıejúzilik soǵys ardagerlerine arnalǵan Máńgilik alaý memorıalynyń qola juldyzyn jymqyrǵan kúdiktini ustady, dep habarlaıdy «QazAqparat» HAA tilshisi.
Qalalyq prokýratýranyń habarlaýynsha, ol - 42 jastaǵy jergilikti turǵyn bolyp shyqty.
«Kúdikti ustaldy jáne aıybyn moıyndap, túsinikteme jazdy. Urlanǵan juldyz keri qaıtaryldy», - dep habarlady Temirtaý prokýratýrasy.
Eske sala ketsek, Temirtaýda Ekinshi dúnıejúzilik soǵys ardagerlerine arnalǵan eskertkishtegi jaýyngerdiń «kıiminiń» bóligi men Máńgilik alaýdaǵy qola juldyzdyń qoldy bolǵany naýryz aıynda habarlandy. Qola juldyzdyń urlanǵany men sarbaz músininiń qıraǵanyn kórgen qalalyq ákimdik qyzmetkerleri quqyq qorǵaý organdaryna aryz jazdy. Qola juldyzdy alǵysy kelgen qaskóıler mármár plıtany syndyrǵan.
Materıal QR QK 188-baby («Urlyq») boıynsha sotqa deıingi tergeýlerdiń biryńǵaı reestrine tirkeldi. Metall bólikterin qabyldaý pýnktterine qatysty jedel sharalar júrgizildi.
