Temirtaýda lombardty tonamaq bolǵan
ASTANA. QazAqparat - Polıtsııa qyzmetkerleri bir aıdyń ishinde Qaraǵandy oblysynyń Temirtaý qalasyndaǵy lombardtardyń birine shabýyl jasaǵan kúdiktini ustady, dep habarlaıdy "QazAqparat" HAA tilshisi.
Aǵymdaǵy jyldyń 7 shildesinde polıtsııaǵa Temirtaý qalasynyń 25 jastaǵy turǵyny shaǵymdanyp, belgisiz azamattyń pyshaqpen qorqytyp, ózi qyzmet atqaratyn lombardttardyń birinen altyn buıymdaryn alyp ketkendigi týraly habarlaǵan. Atalǵan fakti boıynsha sol kúni QR Qylmystyq Kodeksiniń 192-baby 1-tarmaǵyna sáıkes («Qaraqshylyq shabýyl») sotqa deıingi tergeý jumystary bastaldy. Kúdiktiniń jeke basyn anyqtaý, júrgen ortasyn bilý jáne atalǵan qylmysty kórgen bilgenderdi anyqtaý úshin Temirtaý qalalyq Іshki ister basqarmasynyń jeke quramyna baǵyttama berilgen.
"4 tamyz kúni qylmystyq polıtsııa basqarmasy jáne Temirtaý qalalyq ІІB Shyǵys polıtsııa bóliminiń qyzmetkerlerimen júrgizilgen jedel-izdestirý is-sharalary barysynda atalǵan iske qatysy bar degen kúdikpen qalanyń 46-jastaǵy turǵyny ustalyp, onyń qaraqshylyq shabýyl jasaǵandyǵy belgili boldy. Kúdiktini jábirlenýshi tanydy. Kúdikti ýaqytsha ustaý oqshaýlaǵyshyna qamaldy" - dep habarlaıdy Qaraǵandy oblysynyń ІІD baspasóz qyzmeti.
Qazirgi ýaqytta polıtsııa qyzmetkerlerimen kúdiktiniń osyǵan uqsas qylmystarǵa qatystylyǵy tekserilip jatyr.
