Temirtaýda kúzge deıin ystyq sý bolmaýy múmkin

NUR-SULTAN. QazAqparat – Temirtaýda tehnogendik sıpattaǵy tótenshe jaǵdaı jarııalanbaq. Bul týraly qala ákimi Qaırat Begimovtiń qaýlysy «Ashyq» NQA saıtynda ashyq talqylaýǵa shyǵaryldy, dep habarlaıdy QazAqparat tilshisi.

«Temirtaý qalasynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalansyn. Ony joıý sharalaryna Temirtaý qalasy ákiminiń orynbasary V.M.Tsaı jetekshi bolyp taǵaıyndalsyn», - deligen qaýlyda.

Bul sheshimge qatysty Temirtaý qalasy ákimdiginiń baspasóz hatshysy Gúlnur Ábdiǵalıeva túsinikteme berdi.

«Temirtaý qalasyndaǵy №2 jylý magıstralinde jóndeý jumystaryn júrgizý qajettiligine baılanysty jergilikti aýqymdaǵy tótenshe jaǵdaıdy jarııalaý týraly másele kópshilik talqylaý úshin shyǵaryldy. Qys mezgilinde ataǵan jylý magıstralinde apat boldy. Ázirge qalada tótenshe jaǵdaı engizilgen joq. Eger engizilgen jaǵdaıda qalada ystyq sý bolmaıdy», - dep málim etti ákimdiktiń baspasóz hatshysy.

Gúlnur Ábdiǵalıevanyń aıtýynsha, jóndeý jumystary kúzge deıin jalǵasýy múmkin. Sondyqtan ol ystyq sý da shamamen sol kezge deıin bolmaıtynyn jetkizdi.

Foto: www.phcppros.com