Temirtaýda kúıeýin óltirdi degen áıel óli tabyldy
QARAǴANDY. QazAqparat - Temirtaýda kúıeýiniń ólimine kúdikti retinde ustalǵan áıel ýaqytsha ustaý oqshaýlaǵyshynda ózine-ózi qol jumsaǵan bolýy múmkin, dep habarlaıdy «QazAqparat» HAA tilshisi.
Oqshaýlaǵyshty kezekti tekserý barysynda asýly turǵan áıeldiń denesin kezekshi qyzmetker kórip qalady. Temirtaý prokýratýrasyndaǵylardyń aıtýynsha, áıeldiń ólimin sýıtsıd dep ataýǵa bolady, kúshtep óltirý belgileri joq. «Kúdikti nelikten ózin-ózi óltirgenin anyqtaýmyz», - dedi Temirtaý prokýratýrasy qyzmetkerleri.
17 qazan kúni Temirtaýdaǵy páterlerdiń birinde 1985 jyly týǵan er adamnyń birneshe jerinen pyshaq suǵylǵan denesi tabyldy. Onyń azamattyq nekedegi áıeli kúıeýiniń ólimi boıynsha moıyndaý túsinigin berip, ýaqytsha ustaý oqshaýlaǵyshyna qamalǵan bolatyn. Osylaısha, Qylmystyq kodekstiń 99-baby («Adam óltirý») boıynsha ashylǵan qylmystyq is qalpyna kelmeıtin negizderge - kúdiktiniń ólimine oraı jabyldy.
