Temirtaýda kórshisine myltyq atqan er adam ustaldy
TEMІRTAÝ. QazAqparat – Temirtaýda tártip saqshylary kórshisimen janjal barysynda úıinen myltyq alyp shyǵyp, oq atqan er adamdy quryqtady. Ustalǵan azamat kinásin moıyndady, dep habarlaıdy QazAqparat tilshisi.
9 mamyrda jedel-izdestirý is-sharalaryn júrgizý kezinde Temirtaý qalasy PB krımınaldyq polıtsııa qyzmetkerleri oq qarýyn qoldanyp, buzaqylyq jasaǵany úshin izdestirilip jatqan 32 jastaǵy qala turǵynyn ustady.
«Kúdikti óz kinásin moıyndady. «Armsan« markaly tegis uńǵyly myltyq tárkilendi. Tıisti saraptamalar taǵaıyndaldy», - dep habarlady Qaraǵandy oblysy PD baspasóz qyzmeti.
Esterińizge sala keteıik, 8 mamyr kúni saǵat 20:42 shamasynda Temirtaý qalasynda 8 shaǵyn aýdandaǵy aýlalardyń birinde kámeletke tolmaǵan eki bala arasynda janjal boldy. Balalardy ajyratý úshin úılerinen ákeleri shyqqan. Alaıda, jaǵdaıdy anyqtaý barysynda balalardyń biriniń 43 jastaǵy ákesi 32 jastaǵy qarsylasyn betinen urǵan. Sodan keıin sońǵysy úıinen myltyq alyp, eki ret aýaǵa oq atyp, qashyp ketken. Atys kezinde zardap shekkender joq.
