Temirtaýda kólik qaǵyp ketken 46 jastaǵy qala turǵyny kóz jumdy
TEMІRTAÝ. QazAqparat - Temirtaýda 27 jastaǵy kólik júrgizýshisi er adamdy qaǵyp ketip, oqıǵa ornynan qashyp ketpek bolǵan. Zardap shekken adam aýrýhanada kóz jumdy, dep habarlaıdy QazAqparat tilshisi.
1 shilde kúni saǵat 00.35-te Temirtaý qalasy PB 102 telefonyna belgisiz júrgizýshi Mıchýrın kóshesi jaǵynan Respýblıka dańǵylyna qaraı kele jatyp, jaıaý júrginshini qaǵyp ketkeni týraly habarlama kelip tústi. Jaraqat alǵan kisi aýrýhanaǵa jetkizildi.
Alaıda kóp uzamaı, alǵan jaraqatynan qaıtys boldy. Polıtsııa qyzmetkerleri qaza tapqan adamnyń jeke basyn anyqtady. Ol 46 jastaǵy qala turǵyny bolyp shyqty.
«Jol-kólik oqıǵasyn jasaǵan júrgizýshini anyqtaý jáne ustaý maqsatynda jedel-izdestirý is-sharalary barysynda Temirtaý qalasy PB patrýldik polıtsııa batalonynyń qyzmetkerleri Respýblıka dańǵyly boıyndaǵy úılerdiń biriniń aýlasynda jol-kólik oqıǵasy belgileri bar «Daewoo Nexia» markaly avtokólikti baıqady. Polıtsııa qyzmetkerleri osy avtokóliktiń 27 jasar júrgizýshisin anyqtap, ustady, ol jaıaý júrginshini qaǵyp ketkenin moıyndady», - dep habarlady Qaraǵandy oblysynyń PD baspasóz qyzmeti.
Atalǵan fakti boıynsha QR QK 345-baby 3-bólimi boıynsha sotqa deıingi tergeý bastaldy. Tıisti saraptamalar taǵaıyndaldy, tergeý júrip jatyr.
