Temirtaýda qoqys jáshiginen náresteniń máıiti tabyldy
QARAǴANDY. 21 qańtar. QazAqparat - Qaraǵandy oblysynyń Temirtaý qalasynda kóp qabatty úıdiń qoqys jáshiginen jańa týǵan qyz balanyń máıiti tabyldy. Qazir qatygez ananyń kim ekenin anyqtaý jumystary júrgizilip jatyr, dep habarlaıdy qala prokýratýrasynan.
«Kóp qabatty úıdiń qoqys jáshiginen aýla tazalaýshy dúnıe esigin endi ashqan sharananyń óli denesin taýyp alǵan. Bul jaıly ol PIK-ke habarlaǵan, onyń basshysy dereý polıtsııaǵa habar bergen. Oqıǵa ornyna jedel jetken tergeý toby balanyń joldasy men áıel adamnyń kıimin tapqan. Atalǵan derek boıynsha QR QK 97 babyna («Jańa týǵan sábıdi anasynyń óltirýi») sáıkes qylmystyq is qozǵaldy. Qazir qasaqana qylmysqa barǵan áıeldiń kim ekenin anyqtaýǵa qatysty jedel tergeý sharalary júrgizilýde, - deıdi Temirtaý qalasy prokýratýrasynyń qyzmetkerleri.
Quqyq qorǵaý organynyń ókilderi qalada mundaı oqıǵanyń ekinshi ret tirkelip otyrǵanyn aıtady. 2013 jyly 15 jeltoqsanda qalalyq qoqys úıetin orynnan da sharananyń máıiti tabylǵan. Bul oqıǵa boıynsha qylmystyq is qozǵalsa da, kúni búginge deıin qastyq jasalǵan sábıdiń anasynyń aty-jóni anyqtalmaǵan.
