Temirtaýda kassırge pyshaqpen shabýyl jasaǵan er adam qamaýǵa alyndy
QARAǴANDY. QazAqparat - Temirtaýdyń 30 jastaǵy turǵyny eki aıǵa qamaýǵa alyndy. Tergeý nusqasy boıynsha, ol shaǵyn nesıe uıymynyń kassırine pyshaqpen shabýyl jasap, 174 myń teńgeni qoldy etken, dep habarlaıdy «QazAqparat» HAA tilshisi.
«Temirtaý qalalyq sotynyń tergeý sýdıasy Temirtaý ІІB tergeýshisiniń ótinishhatyn qanaǵattandyryp, «qamaýda ustaý» bultartpaý sharasyn sanktsııalady. Bultartpaý sharasynyń merzimi - eki aı», - dep habarlady Temirtaý qalalyq sotynyń baspasóz qyzmetinen.
Mıkrokredıttik uıymǵa jasalǵan qaraqshylyq shabýyl beınebaqylaý kamerasyna túsip qalǵan.
Vıdeodan qylmyskerdiń esikti ashpaq bolǵany kórinedi, al esik qulyptaýly bolǵan. Kassırmen bolǵan shaǵyn dıalogtan keıin vıtrınany judyryqpen uryp syndyryp, jumys ústeline asyp túsken. Úreıi ushqan kassır qyz qashpaq bolyp, esikke qaraı umtylady. Biraq qylmysker ony pyshaqpen qorqytyp, kıiminen súıreı ishke qaıtarady. Ol kassadan 170 myń teńgeni alǵannan keıin, qyzdy ornyna qaıta otyrǵyzyp, jumysyn jalǵastyrýǵa májbúrleıdi. Odan soń jeńinen pyshaqty qaıta alyp shyǵyp, qorqyta bastaıdy.
Jol-patrýldik polıtsııasynyń batalon jasaǵy 30 jastaǵy er adamdy izin sýytpaı ustady. Ol qylmysyn moıyndady jáne jábirlenýshi onyń túr-álpetin tanydy. QR QK-niń 192-baby 2-bóligine («Qaraqshylyq») sáıkes sotqa deıingi tergeý amaldary júrgizilýde.
