Temirtaýda HQO jumysyn qaıta bastady
QARAǴANDY. QazAqparat – Temirtaýda 12 mamyrdan bastap halyqqa qyzmet kórsetý ortalyqtary jumysyn jańǵyrtty. Alaıda koronavırýstyq ınfektsııanyń taralý qaýpine baılanysty HQO ǵımarattaryna adamdar shaǵyn toppen kirgiziledi, dep habarlaıdy QazAqparat.
Búgingi tańda memlekettik qyzmetterdiń 80%-dan astamy egov.kz portalynda elektrondyq formatqa kóshirilgen jáne qoljetimdi. Olardyń barlyǵyn óz betinshe nemese buryńǵydaı HQO ǵımarattarynda emes, ákimdikter janyndaǵy front-keńselerde, oqý jáne medıtsınalyq uıymdarda jáne t. b. ornalastyrylatyn ózine-ózi qyzmet kórsetý sektorlarynan alýǵa bolady.
Onlaın-qyzmetterdi jyldam jáne yńǵaıly alý úshin 1414 nómiri boıynsha habarlasýǵa bolady, onda sizge HQKO operatory keńes beredi.
Esterińizge sala keteıik, Qaraǵandyda da HQKO-nyń jumys tártibi ózgerdi. Ózgerister HQKO-da kórsetiletin memlekettik qyzmetterdiń túrlerine de, olardy usyný formatyna da qatysty boldy. Endi HQKO-da qaraǵandylyqtar tek elektrondyq formatta qol jetimdi emes qaǵaz túrindegi qyzmetterdi jáne pegov.kz ortalynda aldyn ala resimdelgen qyzmetterdiń nátıjelerin alady.
HQKO 1414 nómiri nemese egov.kz portalyndaǵy arnaıy servısi arqyly aldyn ala brondaý boıynsha ǵana barýǵa bolady. Bul jańalyq tek Qaraǵandydaǵy halyqqa qyzmet kórsetý ortalyqtarynyń jumysyna qatysty bolyp otyr. Aýdan ortalyqtary men aýyldyq jerlerde ornalasqan HQKO-lar ózgerissiz jumys isteıdi.
Aıta ketý kerek, TJ rejımi kezinde qazaqstandyqtar elektrondyq úkimet portaly, egov.kz, eGovKzBot2.0 telegramm-boty jáne eGovMobile mobıldi qosymshasy arqyly onlaın-formatta 10,5 mıllıonnan astam memlekettik qyzmet aldy.
