Temirtaýda gúldermen jáne sharlarmen bezendirilgen tramvaılar qyzmet kórsetýde
QARAǴANDY. QazAqparat - Temirtaýda 8 naýryzǵa oraı gúldermen jáne sharlarmen bezendirilgen tramvaılar qyzmet kórsetýde, dep habarlaıdy «QazAqparat» HAA tilshisi.
Áıelderge osyndaı erekshe syılyqty «ArselorMıttal Temirtaý» kompanııasynyń qyzmetkerleri uıymdastyrdy. Mereke kúni qyz-kelinshekterge tramvaıda jol júrý aqysy tegin.
«ArselorMıttal Temirtaý» AQ metallýrgııalyq kombınatynyń ardagerlerine jyl boıy tramvaımen júrý aqysyz.
«Barlyq kólik júrgizýshi áıelderdi óz mashınalaryn qoıyp, tramvaıǵa minýge shaqyramyz. Áıelder tramvaılarǵa otyryp ekologııalyq jaǵdaıdyń jaqsarýynda óz úlesterin qosady», - dep habarlady «ArselorMıttal Temirtaý» kompanııasynyń baspasóz qyzmetinen.
Temirtaýdaǵy tramvaı parki 1959 jyldan beri jumys jasap keledi. Bul óziniń beıindi qyzmetin saqtap qalǵan Qazaqstandaǵy jalǵyz park. Qazirgi tańda bul ekologııalyq taza kólik «ArselorMıttal Temirtaý» kompanııasynyń qaramaǵynda.
