Temirtaýda gaz ballony jarylyp, 5 bala aýrýhanaǵa tústi
Tótenshe jaǵdaı búgin, 13 naýryz saǵat 13:56-da boldy.
«Temirtaý qalasyndaǵy órt týraly habar tústi. 6-shy shaǵynaýdanda bes qabatty turǵyn úıdiń úshinshi qabatynda ornalasqan páterde gaz-aýa qospasy tutanyp, keıinnen janý oryn alǵan. Órt Tótenshe jaǵdaılar departamentiniń kúshterimen saǵat 14:19-da sóndirildi. Jalyn 6 sharshy metr aýmaqty ot sharpydy», - dep málimdedi Qaraǵandy oblysynyń TJD baspasóz qyzmetinen.
Páterde bolǵan 7 adam, onyń ishinde 5 bala ártúrli dárejedegi kúıik jaraqatyn aldy. Olar aýrýhanaǵa jatqyzyldy.
Sondaı-aq oqıǵa saldarynan páter aralyq qabyrǵa, páterdiń syrtqy esigi jáne kireberistiń tereze bloktary zaqymdanǵan.
Qaraǵandy oblysynyń TJD qyzmetkerleri 2-shi qabattan joǵary kópqabatty úılerde gaz ballonyn paıdalanýǵa tyıym salynatynyn eske salady. Durys jumys isteıtin gaz jabdyǵyn ǵana paıdalaný qajet.
Gaz jabdyǵy durys jumys istemegen jaǵdaıda mamandarǵa habarlasý kerek. Jóndeý jumystaryn óz betinshe júrgizý – qaýipti.
Gaz ballondary men gaz jabdyqtaryn tek osy ónimderdi satýǵa arnalǵan sertıfıkattary bar mamandandyrylǵan uıymdardan satyp alý kerek.
Gaz ballondaryn aýystyrý kezinde otty, elektr qurylǵylaryn paıdalanýǵa qatań tyıym salynatynyn árqashan este saqtaý qajet.
Ballondy ornalastyrý tártibi:
- gaz plıtasynan jarty metr qashyqtyqta;
- kez kelgen jylytý qurylǵysynan 1 metr qashyqtyqta;
- eger jylytý qurylǵysy ashyq bolsa, onda ballonǵa deıingi qashyqtyq 2 metrge deıin artady.
