Temirtaýda esirtki dılerleri 200 keli marıhýanamen qolǵa tústi
ASTANA. QazAqparat - Qaraǵandy oblysynyń ІІD Uıymdasqan qylmyspen kúres basqarmasy qyzmetkerleri 200 keli marıhýana satpaq bolǵan esirtki dıleri tobyn áshkerelendi. Bul týraly vedomstvonyń baspasóz qyzmeti habarlaıdy.
Aǵymdaǵy jyldyń 19 sáýirinde oblystyq ІІD Uıymdasqan qylmyspen kúres basqarmasyna Temirtaý qalasyndaǵy garajdardyń birinde asa iri kólemde esirtki zatyn saqtap otyrǵan belgisiz azamat týraly jedel aqparat kelip túsedi.
Sáýirdiń 26 juldyzynda jedel-tergeý sharalaryn júrgizý barysynda polıtsııa qyzmetkerleri 29 jáne 45 jastaǵy Temirtaý qalasynyń eki turǵynyn quryqtady. 29 jastaǵy kúdiktige tıesili garajdy tintý kezinde jalpy salmaǵy 160 kelini quraıtyn 13 qap «marıhýana» tárkilendi. Sondaı-aq, 45 jastaǵy ekinshi kúdiktiniń páterinen 40 kelige jýyq marıhýana tabyldy.
Ustalǵandar óz kinálaryn moıyndap, ýaqytsha ustaý ızolıatoryna qamaldy. Tergeý júrgizilýde.
