Temirtaýda erekshe balalarǵa arnalǵan ońaltý ortalyǵy ashyldy
TEMІRTAÝ. QazAqparat – Temirtaýda erekshe bilim alýdy qajet etetin bar balalarǵa arnalǵan oblystyq ońaltý ortalyǵy jumys isteı bastady. Buryn ata-analar olardy Qaraǵandyǵa alyp baratyn, dep habarlaıdy QazAqparat tilshisi.
Ortalyqta jańa týǵan náresteden bastap 18 jasqa deıingi balalarǵa psıhologııalyq, medıtsınalyq jáne pedagogıkalyq túzetý kómegi kórsetiledi. Jańa mekemede Qaraǵandy oblysynyń ákimi Jeńis Qasymbek bolyp qaıtty.
«Bul tserebraldy sal aýrýy, psıhıkalyq jáne tildik buzylýlary bar balalarǵa arnalǵan oblystyq ortalyq. Temirtaýda mundaı mekeme joq. Qazir bizde 49 bala bar. Balabaqsha jasyndaǵy balalardan qurylǵan úsh top jumys isteıdi. Qysqa merzimdi toptar da bar, onda balalar úsh saǵat boıy aınalysady», – dedi ortalyq dırektorynyń mindetin atqarýshy Sáýle Rústembekova.
Ortalyqta defektolog, logoped, psıholog, medbıke-massajıst, sondaı-aq EDSh nusqaýshylary jumys isteıdi. Ońaltý úshin barlyq jaǵdaı jasalǵan. Mamandardyń aıtýynsha, ýaqtyly kórsetilgen kómek balaǵa tezirek áleýmettenýge múmkindik beredi.
«Eńbekterińiz úshin rahmet! Sizder osyndaı ortalyqtardyń damýyna óz úlesterińizdi qosyp jatyrsyzdar. Jalpy oblysta biz osyndaı balalarǵa jaǵdaı jasaýǵa tyrysamyz jáne jan-jaqty qoldaý kórsetýge daıynbyz», - dedi Jeńis Qasymbek.
Sondaı-aq, oblys ákimi jetinshi qazandyqtyń qurylysy júrip jatqan JEO-2-de boldy. Jumysshylar tirek jaqtaýyn jáne sendvıch panelderin ornatýda, qazandyqtyń negizin daıyndaıdy. Podolsk qalasynda jasalǵan jabdyqtar qurylys alańyna 76% jetkizildi. Jetinshi qazandyqtyń iske qosylýy stantsııanyń jumysyn edáýir jaqsartady jáne turǵyndardy jylýmen qamtamasyz etý máselelerin sheshedi.
Temirtaý boıynsha jumys saparynyń sońynda Jeńis Qasymbek jylytý maýsymyn ótkizý máseleleri boıynsha keńes ótkizdi.
Temirtaý qalasynyń ákimi Qaırat Begimovtyń aıtýynsha, jylýmen qamtý máselesi turaqty baqylaýda. Janarmaı qory barlyq salqyndatqyshtarda bar. Apatsyz jumys isteý úshin barlyq stantsııalarda jóndeý naýqandaryn qarjylandyrýdy ulǵaıtý jáne jabdyqtardy odan ári jańǵyrtý máselesi pysyqtalýda.
«Búgingi tańda ınjenerlik jelilerdi qaıta qurý jáne kúrdeli jóndeý boıynsha segiz joba ázirlenip jatyr. Ekinshi jylý magıstraliniń problemalyq ýchaskesine keletin bolsaq, bıýdjetten tys qarajat sheńberinde 4,4 km jelilerdi qaıta jańartýǵa JSQ ázirleý bastaldy. Shamamen quny – 1,8 mlrd teńge», - dep habarlady Qaırat Begimov.
Oblys ákimi qala basshylyǵyna jetinshi qazandyqtyń qurylysy men jylytý kezeńiniń ótýi boıynsha jaǵdaıdy qatań baqylaýda ustaýdy tapsyrdy.
