Temirtaýda erekshe balalar úshin tegin oqý ortalyǵy ashylady
«Bizdiń qor búkil Qazaqstan boıynsha oqý synyptaryn ashýdy josparlap otyr. Úshinshi oqý ortalyǵyn Temirtaýdan ashtyq. Bul synyptarda aǵylshyn tili, qolóner, jýrnalıstıka, matematıka, sýret jáne ózge de kýrstar boıynsha tegin sabaqtar júrgiziledi. Ustazdar balalarmen kezdesý ýaqytyn ózderi belgileıdi. Oqýshylar ártúrli balalar úıinen keledi», - dedi «Aıalaǵan alaqan» qoǵamdyq qaıyrymdylyq qorynyń basshysy Rada Haırýsheva.
Mundaı ortalyqtar Oral, Aqsaı jáne Astanada ashylǵan. Budan keıin Aqtaý qalasynan ashý josparlanyp otyr.
«Atalmysh joba qomaqty qarajat pen úlken shyǵyndy talap etpeıdi. Biz osylaısha balalarǵa paıdasyn tıgizem degen eriktilerdiń basyn qosamyz. Bizdiń maqsatymyz - bul balalardyń bilimine az da bolsa úlesimizdi qosý», - dedi R. Haırýsheva.
Dál qazir oqý ortalyǵynda jobany júzege asyrý úshin uıymdastyrý jumystary júrgizilip jatyr. Búginde toptar jasaqtalyp, ustazdar quramy anyqtalýda.
