Temirtaýda eks-polıtseıdiń qatysýymen bolǵan jol apatynan bir adam mert boldy
TEMІRTAÝ. QazAqparat - Temirtaýda jol apaty saldarynan 29 jastaǵy qyz qaza boldy. Keıin anyqtalǵandaı, aýdarylǵan kólikti buryn polıtsııa qatarynda qyzmet etken azamat tizgindegen, dep habarlaıdy QazAqparat tilshisi.
Temirtaý mańyndaǵy tasjolda burynǵy polıtseı kóktaıǵaq saldarynan róldi ustaı almaı, jol jıegine ushyp ketken. Aldyńǵy jolaýshy oryndyǵynda otyrǵan qyz oqıǵa ornynda qaza tapty.
«Ekinshi qańtarda shamamen saǵat 23:55-te 27 jastaǵy Hyundai avtokóliginiń júrgizýshisi kóktaıǵaqta róldi basqara almaı, kóliktiń aýdarylyp ketýine jol bergen. 29 jastaǵy jolaýshy oqıǵa ornynda kóz jumdy»,-dep habarlady Qaraǵandy oblysy polıtsııa departamentiniń baspasóz qyzmeti.
Sondaı-aq, vedomstvo atalǵan kóliktiń júrgizýshisi buryn polıtsııada jumys istegenin habarlady. Biraq apat bolǵan kezde onyń ishki ister organdaryna qatysy bolmaǵan.
«Ol buryn polıtsııada jumys istegen. Biraq jeltoqsan aıynda jumystan bosatyldy», - dep habarlady Qaraǵandy oblysy JP baspasóz qyzmeti.
Júrgizýshi kólikti nelikten ustaı almaǵany jáne avtokóliktiń jyldamdyǵy qandaı bolǵany anyqtalýda. Tergeý jumystary júrip jatyr.
«Ony ýaqytsha ustaý ızolıatoryna ornalastyrý máselesi sheshilýde. Barlyq qajetti saraptamalar taǵaıyndaldy»,-dep habarlady oblystyń PD baspasóz qyzmeti.
