Temirtaýda eki áleýmettik mańyzy bar nysan paıda boldy

TEMІRTAÝ. QazAqparat – Temirtaýda birden eki qýanyshty oqıǵa oryn aldy. Bilim kúnine oraı halyq tyǵyz ornalasqan metallýrgter qalasynyń shaǵyn aýdandardyń birinde 320 oryndyq jeke balabaqsha ashyldy. Bıznes tarapynan mektep jasyna deıingi balalar úshin oryn jetispeýshiligi máselesin sheshýge kómek kórsetildi, al ata-analar úshin baǵa memlekettik tapsyrystyń arqasynda qol jetimdi bolady, dep habarlaıdy QazAqparat tilshisi.

Sonymen qatar, mereke kúni jas dárigerlerge jańa páterlerdiń kiltteri tabystaldy. Qaraǵandy oblysynyń ákimi Jeńis Qasymbek temirtaýlyqtardy bilim kúnimen quttyqtady. Ol ınvestorlarǵa qalanyń damýyna qosqan úlesi úshin alǵys aıtty.

Balabaqsha «Kishkentaı talanttar Akademııasy» dep ataldy. Jobanyń bastamashysy «Imstalkon» kompanııalar toby «Barlyq jaqsylyq – balalarǵa» qaǵıdasyn ustandy.

Balabaqsha ádemi jáne jaıly. Mektepke deıingi bilim berýdiń sońǵy úlgidegi jabdyqtarymen qamtylǵan. Birneshe top erekshe qajettilikteri bar balalarǵa arnalǵan. Aýmaqta gúlzarlar men kógaldar ornatyldy.

«Kishkentaı talanttar akademııasynda» qazaq jáne orys tilinde oqytatyn toptar uıymdastyryldy. Aǵylshyn tili de oqytylady.

«Balabaqsha salý ıdeıasy 2018 jyly paıda boldy. Bizdiń úsh kompanııamyz Temirtaýda ornalasqan. Olarda eki myńǵa jýyq qyzmetker jumys isteıdi. Balabaqsha bizdiń qyzmetkerlerimizdiń balalaryna da arnalǵan. Jalpy, bul qalaǵa kómektesedi», - deıdi «Imstalkon» kompanııalar toby dırektorlar keńesiniń tóraǵasy Ivan Georgıadı.

Qaraǵandy oblysynda medıtsına qyzmetkerlerin turǵyn úımen qamtamasyz etý jalǵasýda. Temirtaýda 86 jas mamandar otbasy qonys toıyn toılaıdy. Burynǵy jataqhana ǵımaratynda olar úshin qyzmettik páterler jabdyqtaldy.

«Oblysta densaýlyq saqtaý salasy damyp keledi. Bizdiń mindetimiz – medıtsına qyzmetkerleriniń jumysy úshin laıyqty jaǵdaı jasaý ǵana emes, sonymen qatar turǵyn úı máselesin sheshý.

Ótken jyly jas mamandarǵa 250 páter berildi, osy jyldyń sońyna deıin 170 páter berýdi josparlap otyrmyz. Bul jumys jalǵastyrylatyn bolady. Búgin osy bir ıgi mıssııany oryndap otyrǵanyma qýanyshtymyn», - dep atap ótti Jeńis Qasymbek páter kiltterin jańa qonystanýshylarǵa tabystaı otyryp.

Páterlerde qajetti jıhaz jáne turmystyq tehnıka bar. Olardy jaılastyrýǵa «ArselorMıttal Temirtaý» kásiporny kómektesti.

«Meniń eńbek ótilim – 5 jyl. Temirtaý qalasyndaǵy kópsalaly ana men bala ortalyǵynda 2019 jyldan beri jumys istep kelemin. Buǵan deıin men otbasymmen jaldamaly páterde turdym. Endi maǵan qyzmettik turǵyn úı bólindi. Árıne, jubaıymyzben birge qýanyp jatyrmyz, úsh balamyz bar. Bólmeler keń, jaryq», - deıdi pedıatr, neonatolog Fedor Bandýrın.