Temirtaýda egizderin óli týǵan ana dárigerlermen sottasty
ASTANA. QazAqparat - Temirtaýda egiz perzenttiń óli týýyna sapasyz kórsetilgen medıtsınalyq qyzmet sebep bolǵan. Bul týraly Qaraǵandy oblystyq sotynyń saıtynda jarııalandy.
«Qaraǵandydaǵy №2 Qazybek bı aýdandyq soty Temirtaý qalasynyń turǵyny J-nyń «Oblystyq perınataldyq ortalyǵy» QMK-ge, Temirtaý qalasynyń № 2 emhanasy» QMK-ge, «Temirtaý perzenthanasy» QMK jáne «Qaraǵandy oblysynyń Densaýlyq saqtaý basqarmasy» MM-ge qatysty azamattyq aryz-shaǵymyn qarady. Sotpen anyqtalǵandaı, shaǵymdanýshy júktiliginiń 6 apta merziminde Temirtaý qalasyndaǵy №2 emhanaǵa esepke alynǵan. Júktiligi esh qıyndyqsyz ótken jáne josparly bosaný ýaqyty 2017 jyldyń 15 qarashasyna belgilengen»,- dep jazylǵan habarlamada.
12 qarasha kúni júkti áıel ózin jaısyz sezingen. Temirtaý qalasyndaǵy perzenthanaǵa júginip, ózin jedel jatqyzýyn suraǵan. Alaıda dárigerler ony jatqyzýdan bas tartady. 15 qarasha kúni ol Qaraǵandy qalasyndaǵy Oblystyq perınataldyq ortalyqqa jetkizilip, 17 qarashada egiz balany dúnıege ákeledi. Ókinishke oraı sharanalar óli týady.
Tekseris barysynda júkti áıelge sapasyz medıtsınalyq qyzmet kórsetilgeni anyqtaldy.
«Anyqtalǵan jaǵdaılar esepke alyna otyryp, shaǵymdanýshynyń keı talaptary qanaǵattandyryldy jáne oǵan keltirilgen moraldyq zaqym esebinde 200 myń teńge ótemaqy tóleý týraly sheshim shyǵaryldy. Sheshim zańdy kúshine engen joq»,- dep habarlady sottan.
