Temirtaýda dámhanaǵa kelgen adamdy pyshaqtap ketken
QARAǴANDY. QazAqparat - Temirtaýda dámhanada qaza tapqan er adamnyń ólimine qatysty jańa derekter anyqtaldy, dep habarlaıdy QazAqparat tilshisi.
Oblystyq ІІD-niń málim etýinshe, 22 qyrkúıekte Temirtaý qalalyq ІІB polıtsııasynyń Shyǵys bólimine Respýblıka dańǵylynda ornalasqan dámhanada 49 jastaǵy er adamdy belgisiz bireýler pyshaqtap ketkeni habarlanǵan. Er adam sol jerde qaza tapqan.
«Polıtsııa qyzmetkerleri oqıǵa ornynan pyshaqty tapty. Temirtaý qalalyq ІІB jeke quramy tolyǵymen tartylyp, jaqyn mańdaǵy turǵyndardan jaýap alyndy», - dep túsindirdi vedomstvoda.
Jedel-izdestirý is-sharalary barysynda krımınaldyq polıtsııa qyzmetkerleri 27 jastaǵy qala turǵynyn kúdikti retinde ustaǵan. Ol óz kinásin tolyqtaı moıyndap, zardap shegýshimen janjal kezinde pyshaqtaǵanyn aıtqan.
Kúdikti ýaqytsha oqshaýlaǵyshqa qamaldy. QR QK «Adam óltirý» baby boıynsha tergeý júrip jatyr.
