Temirtaýda bes jasar bala 4-qabattyń terezesinen qulap ketti
TEMІRTAÝ. QazAqparat – Temirtaýda kópqabatty úıdiń tórtinshi qabatynda ornalasqan páterdiń terezesinen bes jasar bala qulap ketti. Balanyń jaǵdaıy aýyr, dep habarlaıdy QazAqparat tilshisi.
8 sáýir kúni tańǵy saǵat 8-de Temirtaý qalasynda 2015 jyly týǵan bala 4-shi qabattaǵy páterdiń terezesinen qulap ketken. Ol aýrýhanaǵa jetkizildi.
«Patsıent kelip túsken sátten bastap jaǵdaıy aýyr, turaqty. Hırýrg, travmatolog jáne reanımatolog qarap shyqty. Bas súıek-mı jaraqatyn alǵan, samaı súıegi soǵylyp, synǵan. Professor H.J. Maqajanov atyndaǵy kópbeıindi aýrýhanaǵa aýystyryldy», - dep habarlady Qaraǵandy oblysynyń densaýlyq saqtaý basqarmasy.
Eresekter men ata-analardyń balalardy baqylaýsyz, qaraýsyz qaldyrýy olardyń jaraqat alýy men ólimine ákep soqtyrady dep eskertedi Qaraǵandy oblysynyń tótenshe jaǵdaılar departamenti.
Vedomstvo taǵy da qaýipsizdik sharalary týraly eske salady jáne ata-analardy balalardy qaraýsyz qaldyrmaýǵa shaqyrady.
