Temirtaýda balany urlaǵan kútýshige qatysty sot otyrysy bastaldy
QARAǴANDY. QazAqparat - Temirtaý qalalyq sotynda eki jasar qyzdy urlaǵan bala kútýshisine qatysty is boıynsha sot tyńdaýy bastaldy, dep habarlady «QazAqparat» HAA tilshisi.
«Tańsholpan» balalar úıiniń túlegi, 22 jastaǵy boıjetken QR QK-niń 125-baby 2-bóligi («Adam urlaý») boıynsha aıyptalýda. Sot tyńdaýy jabyq túrde ótýde.
«Qylmystyq is materıaldarynda kámelettik jasqa tolmaǵan bala týraly málimetter bar. Qylmystyq-protsessýaldyq kodekste jábirlenýshiniń qaýipsizdigi úshin sot tyńdaýynyń jabyq túrde ótýine rusqat bar», - dep habarlady sotta.
Sottalýshy Qaraǵandydaǵy tergeý oqshaýlaǵyshyna qamalǵan. Oǵan qatysty«qamaýda ustaý» bultartpaý sharasy qoldanyldy. Ol balanyń anasynan keshirim surady.
Eske salsaq, 26 naýryzda polıtsııaǵa 22 jastaǵy Temirtaý turǵyny habarlasyp, bala kútýshi áıel eki jastaǵy qyzynurlap ketkeni jaıly aryzdandy. Erli-zaıyptylar jumystan úılerine kelgende, onyń qaldyrǵan qoshtasý hatyn oqyǵan. Kútýshi balanyń jaǵdaıy jaqsy ekenine dálel retinde kúnde áleýmettik jelige onyń sýretin salýǵa ýáde bergen. Jedel shara barysynda 27 naýryzda, tańerteń oblystyń ІІD qyzmetkerleri kúdiktini Astanada ustady.
Ol kútýshi bolyp eki jyl istegen. Ustalǵan sátte birden qyzdyń anasynan keshirim surady. Biraq áıel polıtsııadan aryzyn keri qaıtaryp almady.
