Temirtaýda balalar emhanasy jáne áıelder konsýltatsııasy ashyldy
QARAǴANDY. QazAqparat - Temirtaýda №2 emhana bazasynda kúrdeli jóndeýden keıin pedıatrııalyq bólimshe men áıelder konsýltatsııasy ashyldy. Medıtsınalyq qyzmetterdi «Gıppokrat» MF JShS usynatyn bolady, dep habarlaıdy QazAqparat tilshisi.
Osydan eki jyl buryn Temirtaý qalasynyń №2 emhanasy jeke medıtsınalyq uıymǵa senimgerlik basqarýǵa berilgen bolatyn. Shart talaptary boıynsha «Gıppokrat» JShS óz qarajaty esebinen ǵımaratqa kúrdeli jóndeý júrgizip, qajetti jabdyqtar satyp alýy tıis.
Búgingi kúni ǵımarattyń birinshi qabatynda jóndeý jumystary aıaqtalǵan. Munda pedıatrııa bólimi men áıelder konsýltatsııasy ashyldy. Bul kishkentaı jáne eresek patsıentter aǵynyn ajyratýǵa, sondaı-aq emhanadaǵy jalpy praktıka dárigerlerine júktemeni azaıtýǵa múmkindik berdi.
Osy eki bólimsheniń jumysymen densaýlyq saqtaý basqarmasynyń basshysy Erjan Nurlybaev tanysyp qaıtty. Ol emhananyń jumysyna joǵary baǵa berdi.
«Biz nysandy jeke fırmaǵa senimdi basqarýǵa bergen kezde jergilikti turǵyndarda barlyq qyzmetter aqyly bolady degen úreı týyndady. Alaıda barlyq jumys qoldanystaǵy zańnama normatıvteri aıasynda júrgiziledi. Tegin medıtsınalyq kómektiń kepildi kólemi bar. Ol densaýlyq saqtaý mınıstrliginiń buıryǵymen rettelgen. Medıtsınalyq kómektiń kepildi kólemine kirmeıtin qyzmetter aqyly negizde kórsetiledi. Biraq bul jaǵdaıda da barlyǵy zańmen naqty rettelgen», - dedi basqarma basshysy.
Balalar bóliminde otorınolarıngolog, oftalmolog, nevrapatolog, hırýrg, kardıolog sekildi mamandar qabyldaý júrgizedi. Sondaı-aq, shuǵyl patsıentterdi qabyldaý úshin fılt kabıneti jabdyqtalǵan.
Pedıatrııa bólimshesinde 12 myńnan astam balaǵa qyzmet kórsetiledi. Emhanada barlyǵy 8 ýchaske bar, onda búldirshinderdi 8 pedıatr, 13 pedıatrııalyq medbıke jáne beıindi maman dárigerleri qabyldaıdy.
Sondaı-aq, munda áıelder keńesi ashyldy, ol emhananyń basqa qurylymdyq bólimshelerinen bólek ornalasqan. Bul júkti áıelderdiń ınfektsııa juqtyrý qaýpin tómendetýge múmkindik beredi. Bólimshede, sonymen qatar, kúndizgi statsıonar qarastyrylǵan. Ol zamanaýı medıtsınalyq jabdyqtarmen jabdyqtalǵan.
Medıtsınalyq fırmanyń basshylyǵy mindetti medıtsınalyq saqtandyrý júıesi jumys isteı bastaǵannan keıin qosymsha jabdyqtar satyp alýdy josparlap otyr.
«Jekemenshik sektorǵa mindetti saqtandyrý júıesimen jumys isteý tıimdi bolady. Sebebi biz halyqqa MMSQ-dan tólenetin qarajat esebinen budan da kóp qyzmetterdi usyna alamyz. Eger bári biz josparlaǵandaı bolsa, onda biz munda MRT jáne basqa da qymbat qural-jabdyqtardy qoıǵymyz keledi», - dep málimdedi «Gıppokrat» MF JShS dırektory Nadejda Hohlova.
Emhanadaǵy áıelder konsýltatsııasy 7 akýsherlik-gınekologııalyq ýchaskege eseptelgen. Qazir munda 7 dáriger men 9 akýsher qabyldaý júrgizedi.
