Temirtaýda aýanyń quramynda kómirtek pen kúkirtti sýtektiń joǵary ekeni anyqtaldy
QARAǴANDY. QazAqparat - Temirtaýda aýanyń quramynda kómirtek pen kúkirtti sýtektiń joǵary ekeni anyqtaldy. Kenshiler qalasyndaǵy aýaǵa júrgizilgen zerthanalyq zertteýdiń qorytyndysy osyndaı, dep habarlaıdy «QazAqparat» HAA tilshisi.
«Qorytyndy ár kezde ártúrli. Tańerteń aýanyń kórsetkishi basqasha bolsa, keshke tipti ózgeshe. Naqty qorytyndy birneshe kúnnen keıin daıyn bolady, sebebi qazir ekologtar men meteorologtar aýany tekserip jatyr. 9 ıngredıent - azot dıoksıdi, azot oksıdi, ammıak, kúkirt dıoksıdy, shań, qalqymaly zattar, kúkirt sýtegi, formaldegıd, kómirtek jáne azot oksıdi boıynsha Temirtaýdyń bes aýdanyn zertteý úshin aýa alynyp jatyr», - dep habarlady Temirtaý ákiminiń baspasóz hatshysy Olga Gorıacheva.
Ekologtar men meteorologtar Temirtaýdyń bes aýdanyndaǵy - 68 oramda, 9-ynshy shaǵynaýdanda, 7-inshi shaǵynaýdanda, 8-inshi shaǵynaýdanda jáne eski qalada aýanyń jaǵdaıyn zertteýde.
Sonyń ishinde, 68 oramda kúkirt sýteginiń 0,010%-ǵa (mólsheri 0,008% bolýy tıis) artqany anyqtaldy. Sondaı-aq, 9-ynshy shaǵynaýdanda kúkirt sýteginiń 0,009-ǵa, al kómirtek oksıdiniń 5,2%-ǵa (mólsheri 5,0%) joǵarylaǵany belgili boldy.
7-inshi shaǵynaýdanda kúkirt sýteginiń mólsheri artyp, 0,010-ge (mólsheri 0,008% bolýy tıis) jáne kómirtek oksıdiniń 10,2%-ǵa (mólsheri 5,0% bolýy tıis) jetkeni anyqtaldy.
8-inshi shaǵynaýdanda kúkirt sýtegi mólsheri 0,012-ge, al kómirtek oksıdi 12,2%-ǵa óskeni belgili boldy.
Eski qalada kúkirt sýtegi 0,015, kómirtek oksıdi 6,6%-ǵa artqan.
Eske salaıyq, Temirtaýda qara tústi qar jamylǵysynyń túsý sebebin anyqtaý úshin jumys toby qurylǵan bolatyn. Ákim ekologtardy kún saıynǵy rejımmen jumys isteýge shaqyryp, birneshe kúnnnen keıin naqty usynystar men osy máseleniń sheshý joldaryn usynýdy tapsyrǵan edi.
