Temirtaýda alty metallýrg balqyǵan qospaǵa kúıip qaldy
QARAǴANDY. QazAqparat - 12 qazan kúni 11:29-da «ArselorMıttal Temirtaý» AQ metallýrgııa kombınatynyń koks tsehynda koks batareıasy jarylyp, kúıik shalǵan alty metallýrg aýrýhanaǵa jetkizildi, - dep habarlaıdy «QazAqparat» HAA tilshisi.
Aldyn ala málimetterge qaraǵanda, metallýrgııa kombınatynyń koks tsehynda №1 koks batareıa jumysynyń tehnologııalyq tsıkli buzylǵan. Sonyń saldarynan batareıa jarylǵan. Balqyp turǵan qospa onyń janyndaǵy metallýrgtardy kúıdirip jibergen. Alty jumysshynyń úsheýi Temirtaý qalasyndaǵy ortalyq aýrýhananyń jan saqtaý bóliminde jatyr. Olardyń betteri, denesi jáne qoldaryn kúıik shalǵan. Qalǵandaryn Qaraǵandydaǵy Maqajanov atyndaǵy ortopedııa jáne travmotologııa ortalyǵyna jetkizgen. Olardyń jaraqattary ortasha aýyr deńgeıde dep baǵalanýda.
Budan tys, 11 qazan kúni tańǵy 8-de kombınat aýmaǵynda bir jumysshy mert bolǵan. Tsehtardyń arasynda shoıyn shómish tasymaldap júrgen poıyz jumysshyny basyp ketken. Ol tenderdi utyp alyp, kompanııada qurylys-montajdaý jumystaryn júrgizip jatqan «Tehol-Montaj» JShS jumysshysy bolǵan.
