Temirtaýda alaıaq atanǵan basqarma basshysy aqtalyp shyqty
QARAǴANDY. QazAqparat - Alaıaqtyq jasady degen kúdikke ilingen Temirtaý qalalyq ádilet basqarmasynyń basshysy Ýalıhan Jampeısov aqtalyp shyqty, dep habarlaıdy «QazAqparat» HAA tilshisi.
Temirtaý qalalyq sotynyń sýdıasy aqtaý úkimin jarııalap jatyp, onyń Temirtaý qalasy turǵynynan alǵan 15 000 teńgeniń - jyljymaıtyn múlik nysanyn tirkeýdi jyldamdatý úshin paralyq kómek emes, aqshalaı qaryzdy qaıtarý ekendigin málimdedi. Sýdıa mundaı úkimdi aıyptalýshynyń sózine senip, dálelderdi baǵalaý arqyly shyǵarǵan. Sondaı-aq bul aqshany bergen adamdy tergeý múmkin bolmaǵan.
«Ol qaladan tysqary shyǵyp, sot tyńdalymyna qatyspaǵan. Azamattyń sot protsesine qatyspaýy - onyń pozıtsııasynyń shynaıy emes ekendigin bildiredi», - dedi sýdıa.
Alaıda Temirtaý óńirlik sybaılas jemqorlyqqa qarsy is-qımyl basqarmasynyń qyzmetkerleri basqasha oılaǵan.Temirtaý turǵynynan para bopsalaý týraly shaǵym túsken, olar jasyryn jedel is-sharalar júrgize bastaǵan. Sheneýnik ádilet basqarmasynyń kireberisinde aqsha alǵan kezde, ony ustaǵan.
«Jampeıisov tergeý kezinde para alǵanyn moıyndady. Biraq keıin bul is oblystyq departamentke berildi», - dep habarlady sot tyńdalymy barysynda Temirtaý óńirlik sybaılas jemqorlyqqa qarsy is-qımyl basqarmasynyń qyzmetkeri T. Ábdikárimov. Keıin bul qylmys QR QK 190-baby «alaıaqtyq jasaýǵa umtylý» boıynsha qaıta aýystyryldy.
Іs birneshe ret toqtatylyp, eki jyldan keıin sotqa berildi.
«Іs materıaldary men mán-jaıy tekserilgennen keıin, ár dáleldemeni baǵalap, sot Jempeıisovti kinásiz dep tanyp, ony aqtap shyǵý týraly úkim shyǵardy», - dedi Temirtaý qalalyq sotynyń sýdıasy Asanáli Smaıylov.
Aıyptalýshynyń túsindirýi boıynsha, 2015 jyldyń aqpan aıynyń sońynda ol bir adamǵa 20 000 teńgeni qaryzǵa berip, ony qaıtarý merzimin aıtpaǵan. Ádilet basqarmasynyń ǵımaratynda qaryz alǵang adamdy kezdeısoq kezdestirip, aqshany qaıtarýyn eske salǵan. Eki jylǵa taıaý ýaqytqa sozylǵan istiń basy osydan bastalǵan.
