Temirtaý JEO-daǵy jańa qazandyq kelesi jyly paıdalanýǵa beriledi
NUR-SULTAN. QazAqparat – Qaraǵandy oblysynda jylytý maýsymyna daıyndyq jumystary tolyq aıaqtaldy. Bul týraly búgin Úkimet otyrysynda Qaraǵandy oblysynyń ákimi Jeńis Qasymbek aıtty, dep habarlaıdy QazAqparat tilshisi.
«Búginde jylytý maýsymyna daıyndyq jumystary tolyq aıaqtaldy. Barlyq energııa kózderinde negizgi jóndeý jumystary aıaqtalyp, stansalar shtattyq rejımde jumys isteýde. Otyn qory bar. Ony jetkizý kestege sáıkes júzege asyrylyp jatyr. Injenerlik jelilerde, oqshaý qazandyqtardy, áleýmettik-mádenı, turmystyq nysandardy jáne kóppáterli turǵyn úılerdi daıyndaý boıynsha barlyq josparlanǵan jumystar aıaqtaldy. Syrtqy aýa temperatýrasynyń kúrt tómendeýine baılanysty jáne maýsymaralyq JRVI-men syrqattanýdyń artýyna jol bermeý maqsatynda bıyl 25 qyrkúıekten bastap oblystyń soltústik óńirlerinde jylytý maýsymy bastaldy. Búginde jylýǵa 3 481 turǵyn úı jáne 775 áleýmettik-mádenı, turmystyq nysan qosylǵan», - dedi óńir basshysy.
Jeńis Qasymbektiń aıtýynsha, aýa raıynyń qolaıly bolýyna baılanysty oblystyń ońtústik óńirlerinde jylytý maýsymy 1-15 qazan aralyǵynda bastalady.
«Mınıstr kótergen máseleler qatysty aıtar bolsam, Temirtaý qalasynyń 2-jylý elektr ortalyǵyna jańa 7-shi qazandyqty salý boıynsha búgingi tańda qazandyqtyń qurylysyna arnalǵan alań daıyn. Podolsk mashına jasaý zaýyty 907 tonna kólemdegi qajetti jabdyqtar men metall qurylǵylarynyń bir bóligin jetkizdi. Al «ArselorMıtall Temirtaý» qazandyq jabdyqtaryn daıyndaý jáne qajetti toraptar men agregattardy jetkizý jumysyn jandandyrý úshin kobınat basshylarymen kezdesý ótkizdik. Jospar boıynsha kelesi jyldyń kúzine deıin jumystardyń bári aıaqtalady. Ekinshi másele, kómirmen qamtamasyz etý qatysty óńirde kómir satatyn 35 pýnkt bar. Avtonomdy jylytý jelilerine 854 myń tonna jáne turmystyq qajettilikke 558 myń tonna kómir jóneltildi. Atalǵan nysandarǵa aldaǵy aptanyń sońyna deıin kómir tolyq kólemde jetkiziledi. Kómirdiń ortasha baǵasy ótken jyldyń deńgeıinde qaldy», - dedi oblys ákimi.
