Temirtaý turǵyny tórt áıelge qasaqana AITV ınfektsııasyn juqtyrǵan
QARAǴANDY. QazAqparat - Temirtaýdyń 28 jastaǵy turǵyny tórt áıelge AITV ınfektsııasyn juqtyrǵan. Olardyń biri - 19 jastaǵy jábirlenýshi polıtsııaǵa shaǵymdandy, dep habarlaıdy QazAqparat tilshisi.
Qaraǵandy oblystyq JITS-ke qarsy kúres jáne aldyn alý ortalyǵy ókilderiniń aıtýynsha, qyz jigitpen áleýmettik jelide tanysqan. Qyzdyń senimine kirgen er adam ony alǵashqy jynystyq qatynasqa shaqyrady. Qurbysynyń keńesimen, qyz ortalyqqa kelip qan tapsyrǵanda, AITV ınfektsııasyn juqtyrǵany belgili bolady.
Anyqtalýynsha, er adam 2011 jylǵy qazan aıynan beri JITS ortalyǵynda tirkeýde turǵan. Oǵan, Qazaqstan Respýblıkasynyń zańnamasyna sáıkes, basqa adamǵa vırýs juqtyrǵan jaǵdaıda, qylmystyq jaýapqa tartylatyny týraly aıtylǵan, ınfektsııanyń juǵý joldary túsindirilgen, jynystyq qatynasqa túspek bolǵan jubyna óziniń syrqaty týraly bildirýge mindetti ekendigi aıtylǵan.
Alaıda jigit qyzdarmen ǵalamtor arqyly ońaı tanysyp, olardy ıntımge ıtermelegen. Sonyń saldarynan, tórt áıel jábirlengen. Sonyń úsheýi aıyptyny jaýapqa tartýdy qalamaǵan. Jazasyz qalǵan er adam zańǵa qaıshy áreketterin jalǵastyra bergen.
«Kóp jaǵdaıda, AITV ınfektsııasyn juqtyrǵan adamdardy jumysta shettetýshilik baıqalady. Bálkim, vırýs juqtyrǵan áıelder de, jurtqa jarııa bolýdan qorqyp, eshkimge aıtpaǵan shyǵar. Buryn da osy sııaqty jaǵdaı tirkelgen. 25 jastaǵy Temirtaý turǵyny vırýs juqtyrǵany úshin jeti jylǵa sottalǵan», - deıdi vedomstvo ókilderi.
Materıaldar qylmystyq is ashý úshin quqyq qorǵaý organdaryna berildi. QR Qylmystyq kodeksiniń 118-babyna sáıkes, eki nemese odan kóp adamdarǵa qatysty osy áreket tórt jyldan segiz jylǵa deıin bas bostandyǵynan aıyrýǵa negiz bolady.
«Qyzdar óz densaýlyǵyna jeńil qaramaýy tıis. Jaqyn baılanys ornatýdan buryn, tanysqan adamyn jaqsy bilýi qajet», - deıdi JITS-ke qarsy kúres ortalyǵy ókilderi.
