Temirtaý turǵyny kásipker áıeldi urlap áketip, aqsha bopsalaǵan
QARAǴANDY. QazAqparat - Temirtaý turǵyny kásipker áıeldi urlap áketip, aqsha bopsalady dep kúdiktelýde, dep habarlaıdy «QazAqparat» HAA.
Tergeý nusqasy boıynsha, 23 jastaǵy Shota Djavahıshvılı, Meıram Alpysbaev jáne olardyń taǵy eki sybaılasy kásipker áıeldi kóligin turaqqa qoıyp, úıine bettegende urlap áketken. Áıeldi ormanǵa aparyp, soqqyǵa jyqqan jáne iri kólemde aqsha talap etken. Onyń altyn áshekeılerin sheship alyp, ámııanyndaǵy aqshany da ıemdengen jáne áıeldi júksalǵyshqa salǵan. Іri somada qarajat jymqyrý maqsatynda kásipkerdiń páterine barǵan qaskóıler úıge kire almady. Kásipkerdiń kishkentaı qyzy olarǵa esikti ashpaǵan.
Qylmyskerlerler ózderin polıtsııamyz dep tanystyrǵan. Alaıda, qyz óz anasynyń tanysyna habarlasqanda, qaskóıler izin sýytqan.
Sol arada kásipker áıel júksalǵyshtan shyǵyp, jolaı toqtaǵan kólikpen jaqyn mańdaǵy polıtsııa bólimine jetken. Krımınaldy polıtsııa qyzmetkerleri Grýzııa týmasy Shota Djavahıshvılıdi ustady. Al onyń sybaılasy bolýy yqtımal Meıram Alpysbaevty kásipkerdiń tanystary sol túni-aq ózderi izdep tapty. Ony qaladan tysqary dalaǵa aparyp, atyp óltirgen. Óz betimen jaza taǵaıyndaǵan «tanystarǵa» qatysty qylmystyq is qozǵaldy. Bul epızod boıynsha úsh adam ustaldy.
Temirtaý qalalyq sotynyń habarlaýynsha, Shota Djavahıshvılıge qatysty isti sýdıa Nurlan Asanov qaraýda.
«Sottalýshyǵa QR QK 125-baby «Adam urlaý», 192-baby «qylmystyq toppen qaraqshylyq jasaý», 194-baby «Qorqytyp alý», 200-baby «Avtomobıldi zańsyz ıelený» jáne eski kodekstiń burynǵy nusqasy boıynsha 251-shi «Qarýdy zańsyz saqtaý, tasymaldaý jáne alyp júrý» babymen aıyp taǵyldy», - dep habarlady sot.
