Temirtaý oqýshylary ashanadaǵy tamaqtan bas tartýda
QARAǴANDY. QazAqparat - Temirtaýdaǵy klassıkalyq lıtseı ashanasyn tekserý kezinde odan ishek taıaqshalarynyń bakterııalary tabyldy, dep habarlaıdy QazAqparat tilshisi.
Qoǵamdyq densaýlyqty qorǵaý basqarmasy mamandarynyń jospardan tys tekserýiniń nátıjesinde, ashanada qoldanylatyn ydys-aıaqtardan, jıhazdardan, aspazdardyń arnaıy jumys kıimderinen bakterııalar anyqtaldy.
«Bul anyqtalǵan jaǵdaılar qoǵamdyq tamaqtaný ornynyń sanıtarlyq talaptardy saqtamaı otyrǵandyǵyn kórsetedi», - dedi qoǵamdyq densaýlyqty qorǵaý basqarmasynyń mamany.
Onyń ústine, ashanadan paıdalaný merzimi ótken azyq-túlikter tabylǵan. Sondaı-aq, qaýipsizdik týraly kýáligi joq ónimder de anyqtalǵan. Daıyn ónimniń qunarlylyǵy men maılylyǵyn zertteýge arnalǵan synama nátıjesi onyń normalarǵa sáıkes kelmeıtindigin kórsetken.
Ashanany jospardan tys tekserýge oqýshylardyń ata-analarynyń túsirgen shaǵymdary sebep bolǵan.
