Temirtaý men Balqashta COVID-19 dıagnostıkasy boıynsha zerthanalar ashylady
QARAǴANDY. QazAqparat - Temirtaý men Balqashta koronavırýstyq ınfektsııany anyqtaý jónindegi PTR-zerthanalary ashylady. Bul týraly oblys ákimdiginde ótken apparat keńesi barysynda Densaýlyq saqtaý basqarmasynyń basshysy Erjan Nurlybaev málim etti, dep habarlaıdy QazAqparat tilshisi.
Temirtaýda apta sońyna deıin táýligine 1000 test shyǵaratyn zerthana jumys isteıdi. Tamyz aıynda zertteýler Balqashta da júrgizile bastaıdy.
Al Jezqazǵan qalasynda PTR ortalyǵy jaqynda ǵana ashyldy. Munda táýligine 500-ge deıin test ótkiziledi.
Sonyń arqasynda óńirde COVID-19 dıagnozyn jedel anyqtaýǵa múmkindik keńeıdi.
Qaraǵandy oblysynda PTR ádisimen barlyǵy 78 907 adam tekserildi.
Vırýstyń boljamdy ekinshi tolqynyna daıyndalý úshin óńir aýrýhanalaryna qosymsha jabdyqtar satyp alynady. Qazirdiń ózinde 45 ÓJT (ókpeni jasandy tynys aldyrý) apparaty, 51 ottegi kontsentratory satyp alyndy, olardyń árqaısysy eki patsıentke shaqtalǵan. Sonymen qatar úıde KVI aýrýynyń sımptomsyz jáne jeńil túrlerimen aýyratyn patsıentterdi baqylaýǵa arnalǵan 230 pýlsoksımetr alynǵan.
Qazir gospıtaldarda ortasha jáne aýyr dárejedegi koronavırýs ınfektsııasyn juqtyrǵan 653 patsıent bar. Olardyń 15-i jansaqtaý bóliminde jatyr, úsheýi ÓJT apparatyna qosylǵan. Oblystyń 919 turǵyny ózin-ózi oqshaýlaýda, olardy úıde baqylaıdy.
«Sımptomsyz naýqastar jáne aýrýy jeńil túrde ótetin adamdar qazir úıde emdelip jatyr. Ol úshin emhanalarda osyndaı patsıentterdi baqylaý boıynsha arnaıy bólimsheler ashyldy. Bul statsıonarlarǵa júktemeni azaıtý úshin jasalǵan. Degenmen, eger sımptomsyz naýqastarda ózin-ózi oqshaýlaýǵa jaǵdaı bolmasa nemese qaýipti topta bolsa, ilespeli aýrýlary bolsa, olardy aýrýhanaǵa jatqyzady. Bul jaǵdaılar úshin 737 tósek-oryn qarastyrylǵan. Koronavırýstyq ınfektsııamen aýyratyn naýqastarǵa arnalǵan tósekterdiń jalpy sany - 1 268, onyń ishinde 41 reanımatsııalyq tósek-oryn bar», - dep habarlady Erjan Nurlybaev.
Taýarlar men qyzmetterdiń sapasy men qaýipsizdigin baqylaý departamentiniń málimeti boıynsha, óńirde aýrýshańdyqtyń ósý jaǵdaıy turaqsyz bolyp tur. Osyǵan baılanysty 13 maýsymnan bastap keıbir shekteý sharalary qaıta engizildi: qoǵamdyq kólik qozǵalysy men azyq-túlik jáne azyq-túlik emes dúkenderdiń jumys kestesi ózgerdi.
«Karantındik sharalardy qatań saqtaý kerek. Eger kásiporyndar talaptardy buzsa, olarǵa eskertý jasap, ákimshilik aıyppul salyp, sotqa berý kerek. Eger jaǵdaı ózgermese, qyzmetin toqtatý qajet», - dep atap ótti Qaraǵandy oblysynyń ákimi Jeńis Qasymbek.
Qaraǵandy oblysynda sanıtarlyq talaptardyń saqtalýyn 65 mobıldi monıtorıngtik top qadaǵalaıdy.
