Temirtaý mektepterinde synyptardyń jabylyp jatqany ras pa
TEMІRTAÝ. QazAqparat - Qaraǵandy oblysynyń Temirtaý qalasynda orta bilim berý mektepterinde synyptardyń jabylyp jatqany týraly aqparat shyndyqqa janaspaıdy. Bul týraly oblystyq Bilim basqarmasynan málim etti, dep habarlaıdy QazAqparat.
Aıta keteıik, Facebook paraqshalarynda Temirtaý qalasynyń mektepterinde 20 jıyntyq-synyptyń jabylatyny týraly aqparat taraǵan bolatyn.
«2018 jyldyń 1 qyrkúıeginde Temirtaý qalasynyń 29 mektebinde ortasha qamtylý 25,3 adamdy quraıtyn 903 jıyntyq-synyptarmen tolyqtyrylǵan bolatyn. Ótken oqý jylymen salystyrǵanda oqýshylar sany 700 adamǵa tolyǵyp, jıyntyq-synyptardyń sany - 24 birlikti qurady. 5 mektepte oqýshylar sany tómen bolǵandyqtan jáne bıýdjettik qarajattyń tıimdi paıdalanbaýy saldarynan az qamtylǵan synyptardy biriktirý arqyly 6 jıyntyq-synyp ońtaılandyryldy. Barlyq oqýshylar sol mektepterde qalyp, biriktirilgen synyptarda oqyp jatyr», - delingen Bilim basqarmasynyń habarlamasynda.
Sonymen qatar atap ótilgendeı, barlyq mektepter qajetti pedagogıkalyq kadrlarmen qamtylǵan. Jańa oqý jylynda 17 mektepte defektologtar men logopedterdiń shtattary, 5 mektepte uzartylǵan oqý synyptary ashylǵan.
«Qalanyń bilim salasynyń bıýdjeti ótken jylmen salystyrǵanda 1 mlrd teńgege ósti (2017 jyl - 6,3 mlrd teńge, 2018 jyl - 7,1 mlrd teńge). Bilim berý-tárbıe protsesi shtattyq rejımde júrgizilýde», - dedi basqarmadan.
