Temirtaý karantın jaǵdaıynda qalaı ómir súrip jatyr
Temirtaý turǵyndary úshin eń ózekti máselelerdiń biri - karantın sharalaryn jeńildetý bolyp otyr.
12 mamyr kúni qalada qoǵamdyq kólik qozǵalysyn jandandyryp, shaǵyn jáne orta bızneske jumys isteýge ruqsat berdi. Sulýlyq salondary, aýmaǵy 500 sharshy metrden aspaıtyn azyq-túlik satpaıtyn dúkender, bankter, lombardtar, jeke medıtsınalyq klınıkalar ashyldy. Memlekettik aýrýhanalarda josparly emdeýge jatqyzý qaıta bastaldy.
«Temirtaý turǵyndary úshin epıdemıologııalyq jaǵdaı boıynsha máseleler saqtalatyny týraly aqparat bergim keledi. Biz qalada COVID-19 juqtyrý oshaqtary bar ekenin kórip otyrmyz. Olar baqylaýda. Árıne, aýrýshańdyq deńgeıiniń tómendeýi Temirtaý qalasynda da, oblystyń basqa qalalary men aýdandary boıynsha da boldy. Alaıda, Temirtaý boıynsha jaǵdaı basqa aýdandarǵa qaraǵanda shıelenisken. Degenmen, karantın sharalaryn álsiretip, Bıznestiń basym bóliginde jumysty jandandyrýǵa múmkindik berý týraly sheshim qabyldandy», - dedi Jeńis Qasymbek.
Oblys ákimi sondaı-aq, shaǵyn jáne orta bıznes nysandarynyń ashylýyna qaramastan, koronavırýs ınfektsııasynyń qaıta órshýine jol bermes úshin sanıtarlyq-epıdemıologııalyq normalardy qatań saqtaý qajettigin atap ótti.
Ǵalym Áshimov, óz kezeginde, karantındik shekteýlerge qaramastan, qalany abattandyrý boıynsha josparlanǵan barlyq jumystar atqarylatynyn aıtty. Mysaly, bıylǵy jyly Temirtaýda 26 shaqyrym jolǵa ortasha jóndeý júrgiziledi. Sonymen qatar, úılerdiń 95 qasbetin biryńǵaı arhıtektýralyq stıldi saqtaı otyryp jańartý josparlanýda. Sondaı-aq, qalada jumys istemeıtin lıftterdi aýystyrý jumystary bastaldy. Búgingi kúni jeti kótergish ornatyldy. Bıyl taǵy 50 lıfti jańartylady.
Jeńis Qasymbek júrgizilip jatqan jumystardyń sapasyna baqylaýdy kúsheıtýdi jáne kesteden qalys qalmaýdy tapsyrdy.
