Temirtaý qalasynyń turǵyny oıyn alańynda kishkentaı qyzǵa qol jumsady
QARAǴANDY. QazAqparat - Polıtsııa qyzmetkerleri Temirtaýda balalar aýlasyndaǵy áıeldiń kishkentaı qyzdyń betinen urýyna baılanysty istiń mán-jaıyn tekserip jatyr, dep habarlaıdy «QazAqparat» HAA tilshisi.
Oqıǵany aýladaǵy jasóspirimderdiń biri vıdeoǵa túsirip, qyzdyń ata-anasyna kórsetken. Vıdeodan áıeldiń altybaqanda otyrǵan kishkentaı qyzǵa kelip, betinen jáne basynan úsh ret shapalaqpen jeńil urǵandyǵyn kórýge bolady. Áıel balany altybaqandy qatty terbetkeni úshin jazalaǵan. Soqqydan betin jasyrǵan qyz: «Maǵan tıispeńiz», «Ne istep tursyz?» dep jaýap qaıtarǵan.
Vıdeony áleýmettik jelige jarııalaǵan qyzdyń anasy: «Vıdeodaǵy jas áıel meniń qyzymdy «tárbıeleıdi». Oǵan qyzymnyń átkenshekti qatty terbetkeni unamaǵan. Alańda balaǵa qol jumsaý birinshe ret bolyp turǵan joq» dep jazǵan.
Oqıǵaǵa quqyq qorǵaý organdary aralasty. Qaraǵandy oblysy ІІD baspasóz qyzmetiniń basshysy Baqytjan Qudııarovtyń aıtýynsha, polıtsııaǵa qyzdyń ata-anasynan shaǵym túsken.
«Temirtaý qalasynyń 26 jastaǵy turǵyny ustaldy. Jarııalanǵan vıdeo jáne áıeldi jaýapqa tartý týraly balanyń ata-anasynan kelip túsken shaǵymǵa baılanysty kishkentaı qyz sot-medıtsınalyq saraptamadan ótýge jiberildi. Saraptama nátıjesi boıynsha protsessýaldyq sheshim qabyldanatyn bolady», - dedi Baqytjan Qudııarov.
