Temirtaý qalasy prokýrorlary jer qatynastary salasynda sybaılas jemqorlyq quqyq buzýshylyqtardy anyqtady
ASTANA. 3 tamyz. QazAqparat /Qanat Mámetqazyuly/ -Qaraǵandy oblysy Temirtaý qalasynyń prokýratýrasy jer qatynastary bóliminde tekseris júrgizý barysynda sybaılas jemqorlyq quqyq buzýshylyqtaryn anyqtady.
Bul týraly QR Bas prokýratýrasynyń baspasóz qyzmetinen habarlandy.
«Tekseris barysynda shaǵyn kásipkerlik sýbektileriniń ótinishterin negizsiz sozyp, áýre-sarsańǵa salyp qaraý, jer ýchaskelerin satyp alý-satý, jalǵa berý kelisim sharttarynan bıýdjetke tólemderdi ýaqytynda almaı jasaý derekteri anyqtalǵan. Sonymen qatar Samarqan sý qoımasynyń sý qorǵaý aýmaqtary men beldeýlerinde ornalasqan jer ýchaskelerin sý qoryn paıdalaný jáne qorǵaý salasyndaǵy ýákiletti organnyń kelisiminsiz usyný derekteri de belgili boldy», - delingen baspasóz aıǵaǵynda. Atap aıtqanda, shaǵyn kásipkerlik sýbektileriniń 13 ótinishteri jer qatynastary bólimi tarapynan belgilengen merzimnen artyq qaralǵan. Bul kásipkerlerdiń quqyqtaryn buza otyryp, sybaılas jemqorlyqqa jaǵdaı týǵyzatyn quqyq buzýshylyq bolyp tabylady. Tekserý barysynda jer ýchaskelerin satyp alý-satý jónindegi 9 kelisimshart, jer ýchaskelerin jalǵa berý kelisimsharttary boıynsha jalpy somasy 2 mln. 869 myń 343 teńgege bereshekter bolǵany anyqtaldy.
«Sonymen qatar, Samarqan sý qoımasynyń sý qorǵaý aýmaqtary men beldeýlerinen paıdalanýǵa usynylǵan jer ýchaskeleri jóninde, sý qoryn paıdalaný jáne qorǵaý salasyndaǵy ýákiletti organmen kelisý sharalary qabyldandy. Jer qatynastary bóliminiń zań buzýshylyqqa jol bergen basshysy sybaılas jemqorlyqqa jaǵdaı jasaıtyn quqyq buzýshylyq jasaǵany úshin tártiptik jaýapkershilikke tartyldy», - delingen baspasóz aıǵaǵynda.
