Temirtaý bilim berý bóliminiń basshysy para alýdyń 6 faktisi boıynsha aıyptalýda
QARAǴANDY. QazAqparat - Temirtaý qalasy bilim berý bóliminiń basshysy Baqshagúl Rahymova balabaqshalar men mektepterdiń dırektorlarynan birneshe ret para alý faktisi boıynsha aıyptalýda, dep habarlaıdy «QazAqparat» HAA tilshisi.
Temirtaýdyń sot zalynda sottalýshy QR QK 366-baby, 3-bóliminde kórsetilgen «Birneshe ret para alý» sybaılas jemqorlyq qylmystary boıynsha óz aıybyn tolyq moıyndady. Temirtaý qalalyq sotynyń habarlaýynsha, Rahymova óz aıybyn moıyndap, eń tómengi jaza túrin taǵaıyndaý týraly prokýratýramen kelisimshart jasaýǵa ótinish bildirdi.
«Prokýratýramen óz aıbyn moıyndaý týraly protsessýaldy kelisim bekitý týraly ótinish kelip tústi. Osyǵan baılanysty is protsessýaldy kelisimge qol qoıý úshin prokýratýraǵa qaıtaryldy», - dep habarlady Temirtaý qalalyq soty.
Tergeý nusqasy boıynsha, bilim berý bóliminiń basshysy Baqshagúl Rahymovaǵa para berýde alty laýazymdy tulǵa kúdikti dep tanyldy. Olarǵa qatysty QR QK 367-baby boıynsha («Para berý») bólek is júrgizilýde. Sybaılas jemqorlyqqa qarsy is-qımyl jónindegi Ulttyq bıýronyń Qaraǵandy oblysy boıynsha departamenti paralardyń «jalpy qamqorlyq pen tártiptik sıpattaǵy sharalardy qoldanbaý» maqsatynda berilgenin anyqtady.
