Temirtaý balabaqshasynda balany býyndyrǵan tárbıeshige qatysty qylmystyq is qozǵaldy
QARAǴANDY. QazAqparat - Temirtaýdaǵy jeke balabaqshanyń tárbıeshisi túski demalys ýaqytynda búldirshindi tunshyqtyrǵan, dep habarlaıdy QazAqparat tilshisi.
Beınerolık 27 tamyz kúni áleýmettik jelilerde paıda boldy. Polıtsııa qyzmetkerleri áleýmettik jelilerde monıtorıng júrgizý barysynda «Shok_krg» paraqshasynan áıel adamnyń balanyń ústinen kórpemen basyp, erkinen tys ustap turǵany beınelengen vıdeony anyqtaǵan.
Polıtsııada málim etkendeı, vıdeony zertteý barysynda qalanyń balabaqshalarynyń birinde jumys isteıtin 50 jastaǵy tárbıeshiniń aty-jóni anyqtaldy. Onyń sózinen belgili bolǵandaı, kishkentaı qyz túski demalys ýaqytynda tárbıeshisiniń tilin almaı, tósekte sekire bergen. Oǵan shydamaǵan áıel adam balany kórpemen qysyp ustap turǵan.
«Kámelet jasqa tolmaǵan qyzdyń ata-anasy anyqtaldy. Olar tárbıeshini qylmystyq jaýapkershilikke tartý týraly aryz jazǵan. Oqıǵanyń mán-jaıyn anyqtaý kezinde vıdeo bıylǵy jyldyń mamyr aıynda túsirilip, alaıda jelige 27 tamyzda júktelgeni belgili boldy. Qazirgi ýaqytta tergeý amaldary júrgizilip jatyr. Sondaı-aq, arnaıy saraptamalar taǵaıyndaldy. QR QK-niń 140-baby, 2-bóligine ( «Kámelet jasqa tolmaǵandardy tárbıeleý boıynsha mindetterdi oryndamaý») sáıkes sotqa deıingi tergeý bastalyp ketti», - dedi óńirdiń ІІD-de.
Aıta ketý kerek, tárbıeshiniń kómekshisimen resmı túrde eńbek qarym-qatynasy buzylǵan. Oqıǵanyń egjeı-tegjeıin anyqtaý úshin Temirtaý qalasynyń Bilim departamenti Bilim salasynda baqylaý departamentiniń mamandaryna habarlady.
Sondaı-aq, QR BǴM-niń Balalardyń quqyqtaryn qorǵaý jónindegi komıtetine hat jiberildi.
