Temirtaý aýrýhanasynda bir jarym jasar sábı kóz jumdy
QARAǴANDY. QazAqparat- 3 qańtarda Temirtaý ortalyq aýrýhanasynyń juqpaly aýrýlar bóliminde bir jarym jasar bala kóz jumdy, dep habarlaıdy «QazAqparat» HAA tilshisi.
3 qańtarda Temirtaý ortalyq aýrýhanasynyń juqpaly aýrýlar bólimine bir jarym jasar bala asqynǵan ishek ınfektsııasy jáne gastroenterokolıt aýrýymen tústi. Balanyń ishi ótip, qusyp, temperatýrasy 38,6 gradýsty kórsetti. Antıbakterıaldyq, fermenttik, sımptomatıkalyq jáne ınfýzıondyq terapııa júrgizildi. Degenmen sol kúni keshke qaraı sábı kóz jumdy, dep habarlaıdy densaýlyq saqtaý basqarmasynyń baspasóz hatshysy Aıjan Isa.
Aıjan Isanyń aıtýynsha, anasy aýyrǵan balany 1 qańtardan bastap úıinde óz betimen emdegen, aýrýhanaǵa tek 3 qańtar kúni ǵana ákelgen.
