Temirtaý ákimi turǵyndardy jylýsyz qaldyrǵan kásiporyn basshysyn jumystan bosatty

TEMІRTAÝ. QazAqparat – Temirtaý ákimi Oraz Táýirbekov «Oqjetpes-T» JShS dırektoryn qyzmetinen bosatty. Buǵan qala turǵyndarynyń jylytý máselesine narazylyǵy sebep boldy, dep habarlaıdy QazAqparat tilshisi.

Kommýnaldyq kásiporynnyń jańa dırektory qyzmetine Sergeı Rabotıagov taǵaıyndaldy. Bul týraly Temirtaý ákiminiń qala jurtshylyǵymen kezdesýi kezinde belgili boldy.

«Halyq tarapynan kóptegen shaǵymdarǵa baılanysty «Oqjetpes-T» JShS atyna dırektor laýazymyna Sergeı Rabotıagovty taǵaıyndaý týraly sheshim qabyldandy. Ol Temirtaý týmasy, ony kópshilik biledi. 1998 jyldan bastap kásiporynda jumys isteıdi, sheberden bastap bas ınjenerge deıin ártúrli laýazymdardy atqardy. Onyń aldyna qoıylyp otyrǵan basty másele – jylytý maýsymynyń turaqty ótýi», - dep atap ótti Oraz Táýirbekov.

Temirtaý turǵyndaryn jylytý máselesi biraz ýaqyttan beri alańdatyp keledi.

Metallýrgter qalasyndaǵy úılerge jylý oblystyń basqa qalalary men aýdandarynan keshirek berile bastady.

Merdigerlik uıymdar jylý magıstralin jóndeý jumystaryn keshiktirgen bolatyn.

«Búgingi tańda «AP-IMPEKS» JShS merdiger kompanııasy 4,4 mlrd teńgeniń 2,9 mlrd. teńgesin ıgerdi. Bul 2,9 mlrd teńge qarajattyń 80 paıyzy - qubyr ónimderiniń quny. Merdigerge qatysty shaǵym qujattamasy daıyndalyp jatyr. Kompanııany josyqsyz dep tek sot anyqtaı alady», - dep habarlady Temirtaý ákimdigi.

Asyǵyp jasalǵandyqtan jumys sapasy min kótermeı, magıstral qabyldanbaǵan bolatyn. Nátıjesinde ótken demalys kúnderi 50-den astam úı jylýsyz qaldy.