Temirtaý ákimdiginiń burynǵy qyzmetkeri esirtki saýdalady degen kúdikke ilindi
QARAǴANDY. QazAqparat - Temirtaý ákimi apparatynyń uıymdastyrýdy qamtamasyz etý bóliminiń burynǵy bas mamany 1 kg 677 gramm keptirilgen marıhýana saqtaý, 3 kg 920 gramm qarsora egý jáne ósirý faktileri boıynsha kúdikti bolyp otyr, dep habarlaıdy «QazAqparat» HAA tilshisi.
Qazirgi kezde Qaraǵandy oblystyq qylmystyq ister jónindegi mamandandyrylǵan aýdanaralyq sotynyń sýdıasy Islamhan Esenbaev burynǵy sheneýniktiń isin qarap jatyr.
Tergeý nusqasy boıynsha, Temirtaý ákimi apparatynyń uıymdastyrýdy qamtamasyz etý bóliminiń burynǵy bas mamany óz úıiniń baqshasynda qarasora ósirgen. Keıin alynǵan ónimdi keptirip, satý úshin kishigirim paketterge salǵan.
Polıtsııa 2017 jylǵy 29 maýsymda «Ekspress» bıznes ortalyǵynyń mańynda burynǵy sheneýnik mingen «VAZ 2172» kóligin toqtatady. Tekserý kezinde polıtsııa qyzmetkerleri kóliktiń artqy oryndyǵyndaǵy kúrteniń oń jaq qaltasynan 13 gramm 33 mıllıgramm keptirilgen marıhýana tabady. Ol 2,49 gramm, 3,06 gramm, 2,71 gramm, 2,26 gramm jáne 2,81 grammdyq qaǵaz oramdarǵa salynǵan bolatyn.
Sol kúni burynǵy sheneýniktiń páterin tekserý barysynda dıvannyń astynan 19 gazet túıinshekke salynǵan jalpy salmaǵy 838 gramm bolatyn keptirilgen marıhýana jáne polımer pakette jalpy salmaǵy 407 gramm 80 mıllıgramm bolatyn marıhýana tabyldy. Sondaı-aq shkaftan gazet oramdaryna salynǵan 376 gramm marıhýana, keıinnen 42,42 gramm bolatyn úsh qaǵaz oramy men eki polımer paketi tabyldy.
Budan tys, úıdiń baqshasynan 3 kg 920 gramm bolatyn 604 sora butasy tabylǵan.
