Temirlan Kólbaı «Batys Qazaqstan oblysynyń barysy» atandy
Qazaq kúresi dodasyna barlyǵy 14 balýan qatysyp, baq synady.
Jarystyń bas tóreshisi Artýr Sherǵalıevtiń aıtýynsha, olardyń 12-si oblys aýdandarynan iriktelip kelse, ekeýi Oral qalasynyń namysyn qorǵady.
Bórli aýdanynyń ókili, ótken jyly da oblystyq kezeńde ozyp shyqqan, sonymen qatar sambo men dzıýdodan halyqaralyq dodalarda júlde alyp júrgen Temirlan Kólbaı (salmaǵy 115 kg, bapkeri - Qasym Qajenov) óziniń babynda ekenin kórsetti.
Temirlan áýeli ótken jyly ózimen fınalda beldesken syrymdyq Asqar Nurmuhanovty taza jeńdi. Sodan keıin jartylaı fınalda ózimen birge 2017 jyly «Qazaqstan barysy» respýblıkalyq týrnırine qatysqan qaztalovtyq Ernazar Hamzındi taza túsirdi.
Fınalda T.Kólbaı men «Qazaqstan barysy» respýblıkalyq týrnıriniń taǵy bir qatysýshysy, oraldyq Oljas Súleımenov (101 kg, bapkeri - Qaırat Bersebaev) beldesti. Aldymen balýandar ańdysyp júrgenimen, Temirlan Oljastan aılasyn asyryp, jaýyrynyn jer ıisketti. Osylaısha ol chempıondyq ataq pen belbeýdi jeńip aldy. Endi T.Kólbaı men O.Súleımenov shilde aıynda ótetin «Qazaqstan barysyna» barady.
Bul jarystaǵy jańa esim dep shyńǵyrlaýlyq, salmaǵy aýyr ári jas, 1999 jylǵy Dáýren Zakareevti (135 kg, bapkeri - Qaısar Qusaıynov) aıtýǵa bolady. Ol jartylaı fınalǵa deıin súrinbeı jetti. Fınal joldamasy úshin tartysty básekede Oljas Súleımenovke jol berdi. Sodan keıin qola júlde úshin beldesýde ózinen salmaǵy 45 kelige kem, 25 jasar qaztalovtyq Ernazar Hamzınnen (90 kg, bapkeri - Jeńis Stamǵazıev) de taza jeńilip qaldy.
Qazaq kúresinen salmaq ta óz rólin atqarady. Osy oraıda úzbeı jattyǵyp, baby kelisse, D.Zakareev aldaǵy ýaqytta top jarýy múmkin.
Sonymen, oblystyq jarysta T.Kólbaı - birinshi (500 myń teńge), O.Súleımenov - ekinshi (200 myń teńge), E.Hamzın úshinshi (100 myń teńge) orynǵa ıe boldy.
Eske sala keteıik, ótken jyly «Qazaqstan barysy» týrnırine BQO-dan joldamany T.Kólbaı men A.Nurmuhanov alǵan bolatyn.
