Temirdi qyzǵan kezde soǵý kerek - Aqberen Elgezek

ALMATY. QazAqparat - QR Jazýshylar odaǵy basqarma basshysynyń birinshi orynbasary, belgili aqyn Aqberen Elgezek Qazaqstan Prezıdentin kezekten tys saılaý jaıynda pikirin jetkizdi, dep habarlaıdy QazAqparat.

«Qazir qoǵamda ártúrli áńgimeler tarap jatyr. Bizge ol áńgimeniń qajeti joq. Bıliktiń tranzıti tynysh, beıbit jolmen berilýi halyqqa da, memleketimizge de tıimdi. Temirdi qyzǵan kezde soǵý kerek. Sebebi bizge qazir burynǵydaı kútetin ýaqyt emes, álem ózgerip jatyr. Soǵan sáıkes damýymyz kerek. Menińshe ótken saılaýlarǵa qaraǵanda halyqtyń saýaty ósti. Tartysty ótedi dep oılaımyn. Prezıdent ózi saılaýdyń erkin ashyq ótýine kepil bolady. Bul jolǵy saılaý saıası naýqan bolǵanmen, qoǵamnyń saıası sanasynyń tez ósýine yqpal etpek», - dedi QR Jazýshylar odaǵy basqarma basshysynyń birinshi orynbasary Aqberen Elgezek.

Aıta ketý kerek, búgin Aqorda Memleket basshysy Qasym-Jomart Toqaevtyń Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.

Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.

Óz sózinde Qasym-Jomart Toqaev saılaýdyńǵ ashyq, ádil ótetinine ózi kepildik beretinin aıtty.

«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.