Temirbek Júrgenov atyndaǵy Qazaq ulttyq óner akademııasyna - 85 jyl
ALMATY. QazAqparat - Almatyda Temirbek Júrgenov atyndaǵy Qazaq ulttyq óner akademııasynyń 85 jyldyǵy atalyp ótildi. Respýblıka saraıynda atalǵan akademııany támamdaǵan stýdentter men ustazdary úlken kontsert berdi, dep habarlaıdy QazAqparat tilshisi.
«Búgin elimizde kásibı óner mamandaryn daıyndaıtyn Temirbek Júrgenov atyndaǵy Qazaq ulttyq Óner Akademııasynyń 85 jyldyǵy atalyp ótýde. Resmı jınalystyń ornyna osy Akademııanyń túlekteri men stýdentteriniń, ustazdarynyń jasaǵan kontsertiniń bolǵany asa mańyzdy. 1933 jyly qurylǵan eń tuńǵysh Mýzyka jáne teatr ýchılışesinde talantty ul-qyzdar tálim alyp shyqty. Álemde ulttyq Akademııamyz jetekshi klassıkalyq JOO qatarynan oryn alǵan. Kileń daraboz ónerpazdardan tálim alǵan shákirtter búginde búkil qazaq halqynyń mártebesin asqaqtatyp otyr. QR Prezıdenti N.Nazarbaevtyń Qazaqstan halqyna joldaýyn basshylyqqa ala otyryp, oqý ornynyń ujymy XXI ǵasyrdyń talaptaryna jaýap beretin mamandardy daıyndaýǵa bar kúshin salyp keledi. Bul ulttyq ónerdiń órkendeýine jumys jasaıtyn shyǵarmashylyq elıta bolmaq», - dedi Q Mádenıet jáne sport vıtse-mınıstri Aqtoty Raıymqulova mınıstr Arystanbek Muhamedıulynyń quttyqtaý sózin jetkize otyryp.
Kontserttiń shymyldyǵyn «Turan» toby, horeografııa men tsırk rejıssýrasy fakýltetteriniń stýdentteri ashty.
Atalǵan qoıylym QR eńbek sińirgen qaıratkeri A.A. Orenbýrgskıı jetekshiligimen, estradalyq-sımfonııalyq orkestrdiń súıemeldeýimen júrgizildi.
Sonymen qatar Akademııa týraly derekti fılm kórsetildi.
Kórermenniń qulaq quryshyn QR eńbek sińirgen ártisi Ramazan Stamǵazıev jáne shákirtteri J. Omarhan, D. Murathan, T. Ánápııa, J. Saqaev dombyramen oryndalǵan dástúrli ánmen qandyrdy.
Ánshi Móldir Áýelbekova men Nurlan Alban dombyra aspaby men zamanaýı áýendi qosyp «Aıtarym bar» ánin oryndady. Sondaı-aq, «Voxaccapella» toby qazaq ánderinen án-shashý shashty.
Ónersúıer qaýym QR eńbek sińirgen qaıratkeri Jeńis Seıdollauly, Gaýhar Qaspaqova, Tolqyn Zabırova, «Mezzo» toby, Dınara Sultan, QR Halyq artısi Naǵıma Esqalıeva, Batyrjan Tazabekov, Aıjan Nurmaǵambetova, Roza Rymbaeva syndy ártisterdiń ónerin tamashalady.
Án men kúıden bólek kesh barysynda klassıkalyq gıtarısterdiń «Ómir jasasyn» kompozıtsııasy oryndaldy.
Óner Akademııasynyń bıshiler toby K. Djenkınstiń «Ómir qýaty» kompozıtsııasyna bıledi.
Aıta ketý kerek, Temirbek Júrgenov atyndaǵy Qazaq ulttyq óner akademııasy (burynǵy aty Almaty teatr jáne kıno ınstıtýty) - teatr jáne kıno mamandaryn daıarlaıtyn memlekettik joǵary oqý orny.
