Temir jolǵa taqaý elordalyq mektepterde qaýipsizdik sabaqtary ótti
«QTJ-Júk tasymaly» AQ málimetinshe, kóptegen oqýshy mektepke jáne úıine bara jatqan kezde kúnine keminde eki ret temir joldy kesip ótedi. Osyǵan oraı temirjolshylar balalarǵa joldan qalaı qaýipsiz ótý kerektigin aıtyp berdi.
«Azamattardyń beıqamsyzdyǵynan jolda basyp ketý oqıǵalary oryn alady. Olar joldyń ruqsat etilmegen jerin kesip ótedi. Jastar qulaqtaryna qulaqqap salyp alyp nemese uıaly telefonmen sóılesip temir joldyń relsimen júredi. Sondyqtan lokomotıv dabylyn estimeı qalady. Salmaǵy 6 myń tonna bolatyn júk quramyn bir sátke de toqtatýǵa bolmaıtynyn este ustaý kerek. Poıyzdyń tejeý joly keminde 1 myń metrdi quraıdy. Sol sebepti jaraqat alý táýekeli joǵary», - dedi mashınıst-nusqaýshy Syrym Bekov.
Statıstıkalyq derekterge sáıkes, jyl saıyn temir jol boıynsha 100-den astam qaıǵyly oqıǵa oryn alady. Onyń jartysyna jýyǵynda adamdar mert bolyp jatady.
«Balalar temir jol kólikterimen kóńil kóterý, vagondarǵa miný úshin jıi keledi jáne mundaı oıynnyń saldary aýyr bolýy múmkin ekendigin qaperge de almaıdy. Demalys ýaqytynda ata-analar men muǵalimderdiń tarapynan balalarǵa erekshe baqylaý qajet», - dedi Nur-Sultan stansasynyń qozǵalys qaýipsizdigi jónindegi bas mamany Marjan Aıtmaǵanbetova.
«QTJ-Júk tasymaly» AQ temir joldaǵy qozǵalys qaýipsizdigin buzýdyń qaıtalanýynyń aldyn alýǵa baǵyttalǵan birqatar shara ótkizedi. Máselen, elimizdiń búkil óńirindegi temirjolshylar JІІB, ÁTJK qyzmetkerlerimen birge temir jolda bolý erejelerin túsindirý jumystaryn júrgizedi. Osy jyldyń 1-toqsanynda 12 myńnan astam adamǵa qaýipsizdik sharalary týraly dáris oqyldy. Oqý oryndary men kásiporyndarynda 700-den astam kezdesýler ótti.