Temir jolda bolǵan apattan keıin 250 jolaýshyǵa bıletter quny qaıtaryldy
ASTANA. QazAqparat - Aqmola oblysynda Babataı stansysynda vagondar joldan shyǵyp ketken oqıǵadan keıin 250 jolaýshyǵa bıletterdiń aqshasy keri qaıtaryldy, dep habarlady QazAqparat QTJ-nyń baspasóz qyzmetine silteme jasap.
«27 jeltoqsan kúni keshke Babataı stansysynda bolǵan oqıǵa týraly aqparat túskennen keıin Astana men Qaraǵandydan eki qalpyna keltirý poıyzy jedel attandyryldy.
Oqıǵa saldaryn joıýǵa Aqmola, Qaraǵandy jol bólimsheleriniń barlyq qyzmetteriniń jumysshylary qatysty. Jedel árekettiń arqasynda alty saǵattan keıin jol ashyldy, delingen habarlamada.
«Biz oqıǵa ornyna ýaqtyly jettik, tehnıkany paıdalanyp vagondardy kóterdik. Ujymnyń jumyla jumys isteýiniń arqasynda barynsha qysqa ýaqytta jol ashyldy», - dep atap ótti Astana qalpyna keltirý poıyzynyń bastyǵy Marat Beısenov.
Qozǵalystyń toqtaýyna baılanysty Astana-Qaraǵandy ýchaskesi boıynsha elordalyq temir jol vokzalynda 600-800-ge jýyq adam jınalyp qaldy. «Vokzal ǵımaratyna qosymsha otyratyn oryndyqtar qoıyldy. Olardyń sany 600-ge deıin artty. Balalary bar 50 jolaýshy ana men bala bólmesine jaıǵastyryldy. Egde adamdarǵa qosymsha bólmeler bólindi», - delingen habarlamada.
Úsh mınýt saıyn turaqty túrde dıktorlar jolaýshylarǵa poıyzdyń tehnıkalyq sebepterge baılanysty keshigip jatqanyn habarlap otyrdy. 28 jeltoqsanda saǵat 04.30 mınýtta tilek bildirgen barlyq jolaýshylar saparǵa attandy. Qazir vokzal shtatty rejimde jumys isteýde. 27 jeltoqsanda Osakarovkadan Astanaǵa jolaýshylardy jetkizý úshin 10 shaqty avtobýs bólindi. 250 jolaýshyǵa bıletiniń aqshasy keri qaıtaryldy.
