Temir jol vokzalynda geroın satqan 48 jastaǵy turǵyn sottaldy

NUR-SULTAN. QazAqparat - 48 jastaǵy er adam geroın satqany úshin 6 jylǵa bas bostandyǵynan aıyryldy, dep habarlaıdy QazAqparat kóliktegi polıtsııa departamentine silteme jasap.

25 aqpanda jelilik polıtsııa basqarmasyna belgisiz er adamnyń Almaty-1 temirjol vokzalynyń aýmaǵynda geroın satýmen aınalysatyny týraly aqparat kelip tústi. Bul týraly kóliktegi polıtsııa departamenti bastyǵynyń orynbasary Nurjan Alıbaev aıtty.

Onyń aıtýynsha, kólik polıtseıleri jedel-izdestirý barysynda Almaty qalasynyń 48 jastaǵy turǵynyn ustaǵan.

«Sot-hımııalyq saraptama qorytyndysyna sáıkes kúdiktiden tárkilengen zat jalpy salmaǵy 0,15 grammdy quraıtyn geroın bolyp shyqty. Atalǵan fakti boıynsha QR QK 297-babynyń 1-bóligimen sotqa deıingi tergeý júrgizildi», - deıdi polıtsııa polkovnıgi.

Almaty qalasy Túrksib aýdandyq sotynyń úkimimen joǵaryda atalǵan quqyqbuzýshy qylmys jasaǵany úshin kináli dep tanylyp, oǵan 6 jylǵa bas bostandyǵynan aıyrý jazasy taǵaıyndaldy.

Jyl basynan beri kólik polıtseıleri esirtki aınalymyna baılanysty 403 quqyq buzýshylyqty anyqtady, onyń ishinde 28 ótkizý faktisi, 18 asa iri mólsherde saqtaý faktisi jáne 4 kontrabanda faktisi bar.

Zańsyz aınalymnan 158 keliden asa túrli esirtki quraldary tárkilendi.