Temir jol boıynda belgilenbegen jerden ótken 23 594 azamat jaýapkershilikke tartyldy
ASTANA. QazAqparat - QR ІІM Kóliktegi ishki ister departamentiniń qyzmetkerlerimen jyl basynan beri azamattardyń temir jol boıyndaǵy oryn alatyn baqytsyzdyq jaǵdaılarynyń aldyn alý, bógde zattardy qoıyp ketý, tereze syndyrýdy boldyrmaý maqsatynda stansalarda 653 jıyn ótkizilip, oǵan 13 myń adam qatysty.
Sonymen qatar, 40 myń mal ıelerine temir jol mańynda mal jaıý erejesi tanystyrylyp, 271 keshendi reıdtik sharalar ótkizildi.
Júrgizilgen aldyn alý sharalaryna qaramasatan temir jol boıynda azamattardyń jaraqat alý faktileri áli de azaımaı otyr.
Departamenttiń Ákimshilik polıtsııa basqarmasynyń basshysy Nurlan Sadyqovtyń aıtýynsha, temir jol boıyndaǵy oryn alatyn jazataıym oqıǵalardyń kóp jaǵdaıda azamattardyń eskertýlerge nemquraılylyq tanytyp, júretin joldaryn qysqartý nıetterinen bolatyndyǵyn aıtady.
Jyl basynan beri kólik polıtseıleri temir jol boıyndaǵy belgilenbegen jerlerden ótken 23 594 azamatty ákimshilik jaýapkershilikke tartqan.
«Oqys oqıǵalardyń oryn alýynyń basty sebepteri - azamattardyń belgilenbegen jerlerden joldy kesip ótýi men qaýipsizdik erejelerin saqtamaýy, sondaı-aq jasóspirimderdiń qarapaıym qaǵıdalardy bilmeýi nemese temir jol boıynyń qaýipti aımaq ekendigin eskermeýinen», - deıdi Nurlan Sadyqov.
Temir jol boıyndaǵy poıyzdardyń shuǵyl tejelý faktileri de azaımaı otyr. Aǵymdaǵy jyldyń 10 aıynda 1104 fakti tirkelgen, onyń 674-i temir jol boıynda adamdardyń júrýinen, 292-si maldardyń bolýynan oryn alǵan. Máselen, Zaşıta stansasyndaǵy ishki ister jelilik bóliminiń «Shar-Aıyrtaý» aralyǵynda temir jol boıynda maldardyń jaıylyp júrýine baılanysty 60 shuǵyl tejelý bolǵan. Bul temirjol tósemderiniń toǵandar men maldarǵa arnalǵan jerler jaqyn ornalasqan sharýa qojalyqtarynyń jekemenshik aýmaqtary arqyly ótetindigimen baılanysty. Sondaı-aq, temir jol ótkelderinde avtokólik júrgizýshileriniń kinásinen, ıaǵnı temir jol tósemderinde avtokóliktiń bolýynan 41 shuǵyl tejelý oryn alǵan, dep habarlaıdy Kóliktegi ІІD baspasóz qyzmeti.
