Temir jol bıletin onlaın satyp alǵan alǵashqy 10 adam oljaly qaıtty
ASTANA. QazAqparat - Temirjol kóliginde qyzmet kórsetýdiń jańashyl túrlerin usyný jáne bılet satý arnalaryn keńeıtý maqsatynda «Qazaqstan temir joly» UK» AQ «Jolaýshylar tasymaly» AQ basshylyǵy jol júrý bıletterin elektrondy satýdy damytý boıynsha belsendi qyzmet atqarýda.
Atalǵan kompanııa baspasóz qyzmetiniń habarlaýynsha, tek ústimizdegi jyldyń birinshi toqsanynda elektrondy ádispen 570 037 bılet satyldy. Ótken jyldyń sáıkes kezeńimen salystyrǵanda ósim 2,5 esege artty. Taıaýda iske qosylyp, qazirgi kúni jolaýshylardyń zor iltıpatyna bólenip otyrǵan ınternet arqyly bılet satyp alý ádisi bul qyzmetti ońtaılandyra tústi. Bul ádis boıynsha bıletti resimdeý qashyqtan júzege asyrylyp, bılet kádimgi prınter arqyly basyp shyǵarylady. Al jolaýshylardy poıyzǵa otyrǵyzý elektrondyq tirkeý arqyly júzege asyrylady. Qazirgi kúni atalmysh ádis ilki joba retinde Almaty-Astana (№01/02 poıyz), Oral-Astana (№057/058 poıyz), Atyraý-Almaty (№077/078 poıyz), Aktóbe-Astana (№087/088 poıyz) baǵyttarynda engizilgen. Qazaqstannyń barlyq aımaqtaryn elektrondy satyp alýdyń osy ádisimen 2015 jyly qamtý kózdelip otyr. Internet jelisine qosylǵan kompıýter arqyly bılet satyp alǵan jolaýshy, burynǵydaı kassaǵa júginbeı, tikeleı poıyzǵa barady. Qoldanysqa engizilgenine aıǵa jýyq ýaqyt bolǵanymen, osy ádispen satyp alýshylar sany 100 adamǵa jetip otyr. 2 sáýirde Astana, Almaty-2, Aqtóbe vokzaldarynda «Jolaýshylar tasymaly» AQ ókilderi ınternet arqyly bılet satyp alǵan 100 jolaýshynyń alǵashqy ondyǵyna syılyqtar tabys etti. Joldary bolǵan jolaýshylardyń arasynda Málıka Zýeva, Erjan Kákibaev, Musa Bádirhanov, Hamzııa Haıdar boldy. Osy jáne Aqtóbe men Almaty qalalarynyń vokzaldarynan jolaýshylap bara jatqan jolaýshylarǵa estelik syılyqtar tabys etildi.
