Temekiniń tanymal markalaryn shyǵaryp kelgen astyrtyn fabrıka áshkere boldy
ASTANA. QazAqparat - QR Qarjy mınıstrligi Memlekettik kirister komıtetiniń Ekonomıkalyq tergeý qyzmeti temekiniń tanymal markalaryn shyǵaryp kelgen astyrtyn fabrıka jumysyn áshkere qyldy, dep habarlaıdy QazAqparat.
Komıtet taratqan aqparatqa sáıkes, Ekonomıkalyq tergeý qyzmeti Ortalyq apparatynyń qyzmetkerleri jedel-izdestirý sharalaryn júrgizý barysynda Ońtústik Qazaqstan oblysy, Saıram aýdany, Aqsýkent aýylynyń aýmaǵynda temekiniń tanymal markalaryn shyǵaryp kelgen astyrtyn fabrıkany tapty. Astyrtyn fabrıkany uıymdastyrǵan qylmystyq top óz qyzmetin qoldan jasalǵan aktsızdik markalardy qoldana otyryp, uzaq ýaqyt boıy júzege asyryp kelgendigi anyqtaldy.
«Fabrıkada 800 myńnan astam qoldan jasalǵan aktsızdik markalar, 20 tonnaǵa jýyq temeki jáne temeki ónimderin óndirýge qajetti quramdas materıaldar (temeki súzgileri, temekiniń jyrtylatyn lentalarynyń oramdary, temeki qaǵazdary, temeki folgalarynyń oramdary, temeki jelimderi jáne t.b.) tabyldy. Sondaı-aq Shymkent jáne Taraz qalalarynyń qoıma úı-jaılarynda jáne saýda bazarlarynda qoldan jasalǵan aktsızdik markalary bar temekiniń 110 myńnan astam qoraby anyqtalyp, tárkilendi», - delingen habarlamada.
Atalǵan fakti sotqa deıingi tergeýdiń biryńǵaı tizilimine tirkeldi. Tergeý amaldary júrgizilip jatyr.
